ខួប៩៩ឆ្នាំនៃកងទ័ពរំដោះប្រជាជនចិន៖ ពីបដិវត្តន៍ដើម្បីសន្តិសុខជាតិ ទៅការចូលរួមយ៉ាងខ្ជាប់ខ្ជួនក្នុងការថែរក្សាសន្តិភាពតំបន់ និងពិភពលោក

បរទេស៖ ថ្ងៃទី១ ខែសីហា ឆ្នាំ២០២៦ គឺជាខួបលើកទី៩៩ នៃការបង្កើតកងទ័ពរំដោះប្រជាជនចិន (People's Liberation Army–PLA)។ រយៈពេលជិតមួយសតវត្សរ៍កន្លងមកនេះ កងទ័ពរំដោះប្រជាជនចិនបានវិវត្តពីកម្លាំងបដិវត្តន៍ទៅជាកងទ័ពជាតិដ៏រឹងមាំ ដែលជាសសរស្តម្ភសម្រាប់​ការការពារអធិបតេយ្យភាព បូរណភាពទឹកដី សន្តិសុខជាតិ និងផលប្រយោជន៍អភិវឌ្ឍន៍របស់ប្រទេសចិន។ 

ការវិវត្តនេះមិនត្រឹមតែឆ្លុះបញ្ចាំងពីការកែទម្រង់វិស័យយោធាប៉ុណ្ណោះទេ ប៉ុន្តែថែមទាំងបង្ហាញពីការប្រែប្រួលនៃទស្សនវិស័យសន្តិសុខរបស់ចិន ពីការផ្តោតលើសន្តិសុខផ្ទៃក្នុង ទៅកាន់ការចូលរួមក្នុងអភិបាលកិច្ចសន្តិសុខសកល ស្របនឹងប្រាជ្ញាចិនដែលតែងបានរំលេចថា៖ «ប្រទេសចិននឹងបន្តដើរតាមផ្លូវអភិវឌ្ឍន៍ដោយសន្តិវិធី មិនថាប្រទេសនេះអភិវឌ្ឍដល់កម្រិតណាក៏ដោយ» ដែលនេះជាគោលជំហរ និងជាគោលការណ៍សំខាន់មួយដែលភ្ជាប់ការកសាងកងទ័ពទៅនឹងការរក្សាសន្តិភាព។ អ្វីដែលគួរឱ្យកត់សម្គាល់នោះ គឺការអភិវឌ្ឍសមត្ថភាពយោធារបស់ប្រទេសចិន មិនត្រូវបានពន្យល់ត្រឹមតែការការពារជាតិនោះទេ ដោយប្រទេសចិនបានលើកឡើងជាញឹកញាប់នៅក្នុងគោលនយោបាយការបរទេស និង ការការពារជាតិរបស់ខ្លួនជានិច្ចថា «ប្រទេសចិនបន្តមរតកផ្លូវសូត្របុរាណ ផ្លូវមិត្តភាពនិងកិច្ចសហប្រតិបត្តិការ ដោយគ្មានឆន្ទៈប្រកួតប្រជែងដើម្បីគ្រប់​គ្រង​ប្រទេសដទៃឡើយ»។

 សម្រាប់ប្រទេសចិន ការពង្រឹងសមត្ថភាពយោធាមិនមែនជាគោលដៅដោយឡែកនោះទេ ប៉ុន្តែជាផ្នែកមួយនៃការធានាសន្តិសុខជាតិ ការពារការអភិវឌ្ឍ និងការរួមចំណែកដល់ស្ថិរភាពអន្តរជាតិ ស្របនឹងគំនិតលោក Xi Jinping ប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិន​ស្តីពីការពង្រឹងកងទ័ព ដោយផ្អែកលើគោលការណ៍សំខាន់ៗជាច្រើន​ រួមមានការធ្វើទំនើបកម្មយោធា ការអភិវឌ្ឍតាមរយៈវិទ្យាសាស្ត្រនិងបច្ចេកវិទ្យា ការបណ្តុះ​បណ្តាលកម្លាំងដែលមានគុណភាពខ្ពស់ និងការកសាងកងទ័ពដែលមានសមត្ថភាពស្របតាមនិន្នការយុគសម័យទំនើប។ 

ការអភិវឌ្ឍយោធារបស់ចិនមានគោលបំណងយ៉ាងច្បាស់លាស់ នោះគឺការពារអធិបតេយ្យភាព សន្តិសុខ និងផលប្រយោជន៍នៃការអភិវឌ្ឍជាតិ ព្រមទាំងចូលរួមថែរក្សាសន្តិភាពអន្តរជាតិ ជាក់ស្តែង ប្រទេសចិនតែងបាននិងកំពុង ពង្រីកការចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ ការជួយសង្គ្រោះគ្រោះមហន្តរាយ និង ជំនួយមនុស្សធម៌។ ជាក់ស្តែង ក្នុងនាមជាប្រទេសសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ដែលបានបញ្ជូនកងកម្លាំងរក្សាសន្តិភាពច្រើនជាងគេ និងជាប្រទេសដែលចូលរួមបង់វិភាគទានដល់ប្រតិបត្តិការរក្សាសន្តិភាពរបស់អង្គការសហប្រជាជាតិធំជាងគេលំដាប់ទី២ ប្រទេសចិនបានបញ្ជូនកងកម្លាំងរក្សាសន្តិភាពសរុបជាង ៥០,០០០នាក់ ទៅបំពេញបេសកកម្មនៅក្នុងប្រទេស និងតំបន់ជាង២០។ ចាប់ពីការចូលរួមការពារសុវត្ថិភាព ការធ្វើនាវាចរណ៍នៅឈូងសមុទ្រអាដែន (Gulf of Aden) រហូតដល់ប្រតិបត្តិការជួយសង្គ្រោះមនុស្សធម៌អន្តរជាតិ វត្តមានរបស់កងទ័ពចិនកំពុងលេចធ្លោកាន់តែញឹកញាប់នៅជួរមុខនៃកិច្ចខិតខំប្រឹងប្រែងដើម្បីថែរក្សាសន្តិភាព និង សន្តិសុខពិភពលោក។
 
ក្រៅពីការធ្វើទំនើបកម្មវិស័យការពារជាតិរបស់ខ្លួន ប្រទេសចិនក៏បានពង្រីកកិច្ចសហប្រតិបត្តិការយោធា និងការពារជាតិជាមួយបណ្តាប្រទេសជាមិត្ត រួមទាំងកម្ពុជាដែលជាមិត្តដែកថែបផងដែរ។ តាមរយៈការផ្លាស់ប្តូរបទពិសោធន៍ ការបណ្តុះបណ្តាលធនធានមនុស្ស ការផ្តល់ជំនួយសម្ភារៈ ការអភិវឌ្ឍហេដ្ឋារចនាសម្ព័ន្ធការពារជាតិ និងការធ្វើសមយុទ្ធរួមគ្នា កិច្ចសហប្រតិបត្តិការទាំងនេះបានរួមចំណែកក្នុងការលើកកម្ពស់សមត្ថភាពនិងការធ្វើទំនើប​កម្មវិស័យការពារជាតិរបស់កម្ពុជា ស្របតាមគោលបំណងពង្រឹងសន្តិសុខជាតិ និង ការពារសន្តិភាពក្នុងតំបន់   ស្របតាមកិច្ចកសាងសហគមន៍ជោគវាសនារួមកម្ពុជា-ចិនគ្រប់​​រដូវកាលក្នុងយុគសម័យថ្មី។
 
ឆ្នាំ២០២៦ ក៏ជាខួប៤ឆ្នាំនៃគំនិតផ្តួចផ្តើមសន្តិសុខសកល (Global Security Initiative – GSI) ដែលបានផ្តួចផ្តើមដោយលោក Xi Jinping កាលពីឆ្នាំ២០២២ ដោយសង្កត់ធ្ងន់លើការគោរពអធិបតេយ្យភាព ការប្រកាន់ខ្ជាប់ធម្មនុញ្ញអង្គការសហប្រជាជាតិ ការគោរពកង្វល់សន្តិសុខស្របច្បាប់របស់គ្រប់ប្រទេស ការដោះស្រាយវិវាទតាមការសន្ទនា និងការកសាងសន្តិសុខរួម។  មិនថាបរិបទពិភពលោកមានការប្រែប្រួលយ៉ាងណាក៏ដោយ ប្រទេសចិននឹងបន្តជាតួអង្គដ៏សំខាន់បំផុតមួយក្នុងការ​គាំពារ​​សន្តិសុខសកល និងការរៀបចំស្ថាបត្យកម្មសន្តិសុខក្នុងសតវត្សរ៍ទី២១ និងសតវត្សរ៍ក្រោយៗទៀត៕ ដោយ៖ បណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន