អាជ្ញាធរខេត្តមណ្ឌលគិរី រៀបចំយុទ្ធនាការ ប្រឆាំងព័ត៌មានក្លែងក្លាយ «និយាយថាទេ ចំពោះព័ត៌មានក្លែងក្លាយ»

អត្ថបទ៖ ជឹម ទូច

ខេត្តមណ្ឌលគិរី ៖​ ដើម្បីបន្សាបឥទ្ឋិពលអវិជ្ជមានពីក្រុមបង្កើតព័ត៌មានក្លែងក្លាយ និងអ្នកធ្វើមាតិកាក្លែងបន្លំសភាពការនានា ក្នុងមូលដ្ឋាន អាជ្ញាធរខេត្តមណ្ឌលគិរី នាព្រឹកថ្ងៃទី៣ ខែធ្នូ ឆ្នាំ២០២៥ បានរៀបចំយុទ្ឋនាការ ប្រឆាំងព័ត៌មានក្លែងក្លាយ និយា​យថា​ទេ​ចំ​ពោះ​ព័ត៌មានក្លែងក្លាយ ដោយមានការផ្សព្វផ្សាយពាក្យស្លោក និងដង្ហែក្បួនមហាជនតាមទីសាធារណៈ ពីសំណាក់ថ្នាក់ដឹកនាំខេត្ត កងកម្លាំងទាំងបីប្រភេទ មន្ត្រីរាជការ ស្ថាប័នវិស័យឯកជន អ្នកសារព័ត៌មាន និងអ្នកផលិតមាតិកា លោកគ្រូ អ្នកគ្រូ យុវជន ប្រជាពលរដ្ឋ និងសិស្សានុសិស្សប្រមាណ ២០០​នាក់ ដែលប្រព្រឹត្តទៅនៅសួនដំរីដេក ក្រុងសែនមនោរម្យ ។

លោក ហ៊ាញ ប៊ុណ្ណា អភិបាលរងខេត្តមណ្ឌលគិរី មានប្រសាសន៍ថា ក្នុងបរិបទនៃការរីកចម្រើនឥតឈប់ឈរនៃបច្ចេកវិទ្យា ការទទួលនិងផ្សព្វផ្សាយព័ត៌មានបែបទំនើប ប្រព័ន្ធឌីជីថល បណ្តាញទំនាក់ទំនងសង្គម បានកើនឡើងជាលំដាប់ ការគ្រោះថ្នាក់នៃ ព័ត៌មានក្លែងក្លាយ ទាំងនេះរឹតតែមានលក្ខណៈស្រួចស្រាល់ឡើង។ បរិការណ៍នេះទាមទារ ឱ្យ ពលរដ្ឋដែលជាអ្នកប្រើប្រាស់ ឬអ្នក​ផលិត​ព័ត៌មាន ឬចែកចាយព័ត៌មាន ស្វែងយល់ ដឹងឲ្យបានច្បាស់ អំពីផលវិបាកនៃព័ត៌មានក្លែងក្លាយ ហើយចេះបង្កើនការប្រុ​ងប្រ​យ័ត្ន​ក្នុងការប្រើប្រាស់ បណ្តាញសង្គម ប្រកបដោយការទទួលខុសត្រូវ ពិសេសមុនចែកចាយព័ត៌មានណាមួយ ត្រូវផ្ទៀងផ្ទាត់ ព័ត៌មាន​ទាំងនោះជាមុនសិន។

លោក អភិបាលរង បន្តថា ពលរដ្ឋឌីជីថល ត្រូវស្វែងយល់បន្ថែមពីរបៀប ក្នុងការកំណត់អត្តសញ្ញាណ ព័ត៌មានក្លែងក្លាយ វិធានការ​ទប់ស្កាត់ ការរីកសាយភាយ និងការបន្សាបព័ត៌មានក្លែងក្លាយ។ ត្រូវចូលរួមបំផុស ការបង្កើតទម្លាប់ប្រើប្រាស់បណ្តាញសង្គម ដោយ​ការទទួលខុសត្រូវ ដោយផ្សព្វផ្សាយតគ្នាអំពីវិធា ការសុវត្ថិភាពឌីជីថល ភាពចាំបាច់ និងរបៀបក្នុងការបង្ការហានិភ័យ និងសកម្មភា​ពនា​នាចាំបាច់ ក្នុងការធានាសុវត្ថិភាពព័ត៌មានក្នុងសង្គមរស់នៅ។ លោក ហ៊ាញ ប៊ុណ្ណា បានសង្កត់ធ្ងន់ថា ពលរដ្ឋក្នុងសហគមន៍ អ្នកសារព័ត៌មាន អ្នកមានឥទ្ធិពល និងបង្កើតមាតិកាលើបណ្តាញ សង្គម យុវជន មន្ត្រីរាជការ អាជីវករ និងពិសេសអ្នកប្រើប្រាស់បណ្តាញសង្គម ត្រូវចូលរួមក្នុង យុទ្ធនាការប្រឆាំងព័​ត៌មានក្លែ​ងក្លា​យ​ដោយប្រកាន់ខ្ជាប់ទម្លាប់ល្អគឺ៖ ការបង្កើត ចែកចាយ និង ផ្សព្វផ្សាយព័ត៌មានពិត មានប្រភពច្បាស់លាស់ និងដោយក្រមសីលធម៌ វិជ្ជាជីវៈត្រឹមត្រូវ។

លោក សុន សារឿន ប្រធានមន្ទីរព័ត៌មានខេត្តមណ្ឌលគិរី បានឲ្យដឹងថា ក្រុមការងាររបស់មន្ទីរបានសស្រាក់​សស្រាំ​ធ្វើ​ការងារកាន់តែសកម្មទៅលើការគាំទ្រដល់គណៈបញ្ជាការឯកភាព និងរដ្ឋបាលខេត្ត លើការងារគ្រប់គ្រងសាធារណមតិ គ្រប់គ្រង​ព័ត៌មាន និង​សាធារ​ណមតិមហាជន ដោយតាមដានព័ត៌មានធ្វើការឆ្លើយតប បកស្រាយ ផ្សព្វផ្សាយនូវព័ត៌មានពិត ត្រឹមត្រូវជូន​ប្រជាពលរដ្ឋ​ឱ្យយ​ល់ដឹងពី​គោល​នយោ​​បា​យរបស់រាជរដ្ឋាភិបាល រួមទាំងដំណើរការអភិវឌ្ឍរីកចម្រើនរបស់ប្រទេសជាតិ ជាពិសេស​បានទប់ស្កាត់ និងប្រឆាំងព័ត៌មានក្លែងក្លាយ​ ទាន់ពេ​ល​វេលាជាច្រើនករណីនាពេលកន្លងមកនេះ ៕