របបសឹកមីយ៉ាន់ម៉ា អះអាងពីការបំផ្លាញអគារជិត ១៥០ខ្នង ក្នុងប្រតិបត្តិការបង្រ្កាបទីតាំងបទល្មើសឆបោកតាមអនឡាញ

មីយ៉ាន់ម៉ា៖ យោធាមីយ៉ាន់ម៉ា កាលពីថ្ងៃអាទិត្យ ទី៩ ខែវិច្ឆិកា បានអះអាងថាខ្លួនបាន និងកំពុងបំផ្លាញអគារជិត១៥០ខ្នង នៅក្នុងប្រតិបត្តិការបង្ក្រាបបទល្មើសឆបោកតាមអនឡាញនៅតំបន់ព្រំដែនជាប់ជាមួយថៃ។

នៅក្នុងការធ្វើបច្ចុប្បន្នភាពមួយ ប្រព័ន្ធផ្សព្វផ្សាយរដ្ឋមីយ៉ាន់ម៉ា The Global New Light of Myanmar បានរាយការណ៍ថាយោធាមីយ៉ាន់ម៉ាបានរកឃើញអគារ ១៤៨ខ្នង ក្នុងនោះរួមមានអន្តេវាសិកដ្ឋាន អគារមន្ទីរពេទ្យកម្ពស់៤ជាន់ និង KTV កម្ពស់២ជាន់ដែលមានលួចលាក់ធ្វើសកម្មភាពឆបោកតាមអនឡាញ។ «អគារ១០១ខ្នងត្រូវបានបំផ្លាញ និងនៅសល់ ៤៧ខ្នងទៀតកំពុងស្ថិតក្នុងដំណើរការបំផ្លាញ»។ នេះជាការបញ្ជាក់បន្ថែមរបស់ប្រព័ន្ធផ្សព្វផ្សាយរដ្ឋមីយ៉ាន់ម៉ា។

សូមជម្រាបថា កាលពីខែតុលា យោធាមីយ៉ាន់ម៉ា បានប្រកាសពីការធ្វើប្រតិបត្តិការឆ្មក់បង្រ្កាបមួយលើមជ្ឈមណ្ឌលឆបោកតាមអនឡាញ KK Park ដោយចាប់ខ្លួនមនុស្សជាង ២០០០នាក់ និង១៥០០នាក់ ទៀតបានរត់ចូលទៅក្នុងទឹកដីថៃ៕ (Reuters)