៩ខែ ឆ្នាំ២០២៥ កម្ពុជាទទួលបានអ្នកដំណើរតាមផ្លូវអាកាសជាង ៥លាននាក់ កើនជាង១៤ភាគរយ

ភ្នំពេញ៖ ក្នុងរយៈពេល៩ខែ ពោលចាប់ពីខែមករា ដល់ខែកញ្ញា ឆ្នាំ២០២៥នេះ ការដឹកជញ្ជូនតាមផ្លូវអាកាសនៅកម្ពុជាមានជាង ៤ម៉ឺនជើង កើនជាង១២ភាគរយ ដោយទទួលបានអ្នកដំណើរជាង ៥លាននាក់ កើនជាង១៤ ភាគរយ។ នេះបើតាមការឱ្យពី លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល។

មន្រ្តីជាន់ខ្ពស់រូបនេះ បានថ្លែងឲ្យដឹងថា គិតចាប់ពី ខែមករា ដល់ ខែកញ្ញា ឆ្នាំ២០២៥ ព្រលានយន្តហោះទាំងបីរបស់កម្ពុជា ទទួលបានជើងហោះហើរចេញ-ចូល (ទ្វេទិស) មានចំនួនជាង៤ម៉ឺនជើង ឬស្មើ៤៧,៦៣៧ជើង កើនឡើង១២% បើធៀបទៅនឹងរយៈពេល៩ខែ ដូចគ្នាទៅនឹងឆ្នាំ២០២៤។

ចំណែកអ្នកដំណើរចេញ-ចូល (ទ្វេទិស) មានចំនួនជាង៥លាននាក់ ឬស្មើនឹង៥,១០៩,៣២៥ នាក់ កើនឡើង១៤% បើធៀបទៅនឹងរយៈពេល៩ខែ ដូចគ្នាទៅនឹងឆ្នាំ២០២៤។ លោកបញ្ជាក់ថា ចំពោះក្រុមហ៊ុនអាកាសចរណ៍ ដែលកំពុងប្រតិបត្តិការហោះហើរចេញ-ចូល អាកាសយានដ្ឋានអន្តរជាតិនៅកម្ពុជាមានចំនួន ២៨ក្រុមហ៊ុនក្រុមហ៊ុនអាកាសចរណ៍ក្នុងស្រុកចំនួន៤ និងក្រុមហ៊ុនអាកាសចរណ៍ក្រៅស្រុកចំនួន២៤។

សម្រាប់ការទំនិញតាមផ្លូវអាកាស ចេញ-ចូល (ទ្វេទិស) មានចំនួនជាង ៦ម៉ឺនតោន ឬស្មើ៦៤,៥១៣ តោន មានការកើនឡើង១៤% បើធៀបទៅនឹងរយៈពេល៩ខែដូចគ្នាទៅនឹងឆ្នាំ២០២៤៕