ត្រាំ ថា ចង់បានកិច្ចព្រមព្រៀងពាណិជ្ជកម្មមួយដែលស្មើភាព ជាមួយចិន

 ប្រភព៖ Reuters

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ ទី៣ ខែឧសភា បាននិយាយថា សហរដ្ឋអាមេរិក កំពុងជួបជាមួយប្រទេសជាច្រើន រួមមានទាំងចិនផងដែរ ស្តីពីកិច្ចព្រមព្រៀងពាណិជ្ជកម្ម ហើយអាទិភាពចម្បងរបស់លោកជាមួយចិន គឺធ្វើយ៉ាងណាសម្រេចឱ្យបានកិច្ចព្រមព្រៀងមួយ ដែលមានយុត្តិធម៌។

លោក ត្រាំ បានប្រាប់ក្រុមអ្នកសារព័ត៌មានថា លោកគ្មានគម្រោងសន្ទនាជាមួយប្រធានាធិបតីចិន លោក ស៊ី ជីនពីង ក្នុងសប្តាហ៍នេះទេ ប៉ុន្តែក្រុមមន្រ្តីអាមេរិក កំពុងជជែកជាមួយក្រុមមន្រ្តីចិន អំពីរឿងជាច្រើន។

សូមជម្រាបថា ក្រុមមន្រ្តីអាមេរិក បានបើកជំនួបជាបន្តបន្ទាប់ជាមួយ បណ្តាដៃគូពាណិជ្ជកម្មរបស់សហរដ្ឋអាមេរិក ចាប់តាំងពីលោក ត្រាំ កាលពីថ្ងៃទី២ ខែមេសា បានយកពន្ធ១០ភាគរយ លើប្រទេសភាគច្រើន រួមជាមួយអត្រាពន្ធខ្ពស់ លើដៃគូពាណិជ្ជកម្មជាច្រើនផ្សេងទៀត ដែលក្រោយមកត្រូវបានពន្យារពេល៩០ថ្ងៃ។ មិនតែប៉ុណ្ណោះ លោក ត្រាំ ក៏បានដំឡើងពន្ធ ២៥ភាគរយលើរថយន្ត ដែកថែប និងអាលុយមីញ៉ូម, ២៥ភាគរយលើកាណាដានិងម៉ិកស៉ិក ព្រមទាំង១៤៥ភាគរយលើចិន៕