ត្រាំ នឹងដាក់​ពន្ធ​ឆ្លើយតប​ទ្រង់ទ្រាយ​ធំលើដៃគូពាណិជ្ជកម្មពិភពលោក​ដែល​បង្កើន​ភាព​តានតឹង​ពាណិជ្ជកម្ម​សកល

 ប្រភព៖ Reuters

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ ត្រូវបានគេរំពឹងថានឹងដាក់ពន្ធឆ្លើយតបថ្មីលើដៃគូពាណិជ្ជកម្មពិភពលោក ដែលជាវិធានការមួយដែលត្រូវបានគេមើលឃើញថា នឹងបង្កើនភាពតានតឹងពាណិជ្ជកម្មសកលយ៉ាងខ្លាំង។

ប្រធានាធិបតី​ ដូណាល់ ត្រាំ បានអះអាងថា ផែនការពន្ធទៅវិញទៅមកនេះ គឺជាមធ្យោបាយមួយដើម្បីកែសម្រួលអត្រាពន្ធទាបរបស់សហរដ្ឋអាមេរិក ឱ្យស្របតាមអត្រាពន្ធដែលប្រទេសផ្សេងៗដាក់លើអាមេរិក ក៏ដូចជាទប់ទល់នឹងឧបសគ្គមិនមែនពន្ធដែលរារាំងការនាំចេញរបស់អាមេរិក។ ទោះជាយ៉ាងណាក៏ដោយ ទម្រង់ពិតប្រាកដនៃពន្ធនៅតែមិនច្បាស់លាស់ ដោយមានរបាយការណ៍ថា លោក ត្រាំ កំពុងពិចារណាដាក់ពន្ធសកលរហូតដល់ ២០%។

សេចក្តីលម្អិតនៃផែនការពន្ធដែលលោក ត្រាំ បានដាក់ឈ្មោះថាជា ទិវារំដោះអាមេរិក នៅបន្តស្ថិតក្រោមការរៀបចំ នៅមុនសេចក្តីប្រកាសជាផ្លូវការដែលគ្រោងធ្វើឡើងនៅសេតវិមាននាពេលរសៀលនេះ។ ពន្ធថ្មីៗទាំងនេះ នឹងចូលជាធរមានភ្លាមៗបន្ទាប់ពីប្រធានាធិបតី ត្រាំ ប្រកាស ខណៈដែលពន្ធ ២៥% លើការនាំចូលរថយន្តនឹងចូលជាធរមាននៅថ្ងៃទី ៣ ខែមេសា។

អតីតមន្ត្រីពាណិជ្ជកម្មក្នុងអាណត្តិទីមួយរបស់លោក ត្រាំ បានព្យាករថា ប្រធានាធិបតីរូបនេះ ទំនងជានឹង​ដាក់​ពន្ធ​ទូលំទូលាយ​លើ​ប្រទេស​នីមួយៗ​ក្នុង​អត្រា​ទាប​ជាង ប៉ុន្តែ​ប៉ះពាល់​ដល់​ប្រទេស​ច្រើន​អាចលើសពីការ​រំពឹង​ទុក។

ប្រតិកម្មពីអន្តរជាតិក៏បានបន្តកើតមានផងដែរ ដោយប្រធានធនាគារកណ្តាលអឺរ៉ុប លោកស្រី Christine Lagarde បានព្រមានថា ការដំឡើងពន្ធតាមគម្រោងរបស់លោក ត្រាំ នឹងមានផលវិបាកអវិជ្ជមានជាសកល។ លោកស្រីបានគូសបញ្ជាក់ថា ផលប៉ះពាល់នឹងមានភាពខុសគ្នាអាស្រ័យលើវិសាលភាព ផលិតផលគោលដៅ រយៈពេលអនុវត្ត និងលទ្ធភាពនៃកិច្ចចរចា។

អ្នកដឹកនាំអាជីវកម្មក្នុងវិស័យផ្សេងៗគ្នា ចាប់ពីរថយន្ត ដឹកជញ្ជូនទំនិញ ដល់ទំនិញប្រណីត បានសម្តែងការព្រួយបារម្ភចំពោះផលប៉ះពាល់ដែលអាចកើតមាន ដោយសារតែលោក ត្រាំ កន្លងមកធ្លាប់បានប្រើប្រាស់អំណាចពិសេស ដើម្បីដាក់ពន្ធយ៉ាងឆាប់រហ័ស និងពេលខ្លះដកហូត ឬកែប្រែពន្ធទាំងនោះផងដែរ៕