រដ្ឋមន្ត្រី ឌិត ទីណា អញ្ជើញចុះពិនិត្យការងារវារីវប្បកម្ម​ក្នុងកសិដ្ឋានផលិតកូនត្រី​ ជា​ សុភិន​ នៅខេត្តបន្ទាយមានជ័យ

ដោយ : ម៉ា សុភាព

ខេត្តបន្ទាយមានជ័យ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ​ និងថ្នាក់ដឹកនាំ នៅល្ងាចថ្ងៃទី២៦ ខែមីនា ឆ្នាំ២០២៥ បានអញ្ជើញចុះពិនិត្យការងារវារីវប្បកម្ម​ក្នុងកសិដ្ឋានផលិតកូនត្រី​ ជា​ សុភិន នៅ​ឃុំគំរូ ស្រុកថ្មពួក ខេត្តបន្ទាយមានជ័យ។​

សូមជម្រាបជូនថា​ លោក​ ជិន​ សុជា​ ជាម្ចាស់កសិដ្ឋានផលិតកូនត្រីរូបនេះ មានផ្ទៃដីសរុបចំនួន​ ៤ហិកតា​ មានស្រះសរុបចំនួន​ ៤៧​ស្រះ សម្រាប់ចិញ្ចឹមពូជត្រី រួមមាន៖ ត្រីក្រាញ់​ ត្រីអណ្តែង​ ត្រីរ៉ស់​ ត្រីឆ្ពិន​ ត្រីឆ្លាំង​ និងត្រីទីឡាបព្យាក្រហម​។ នៅឆ្នាំក្រោយ កសិដ្ឋានមានគោលបំណងពង្រីកបន្ថែមពូជត្រីចំនួន​៣បន្ថែមទៀត ដូចជា៖ ត្រីតាឱន​ ត្រីកេះ​ និងត្រីកន្ធរ។​

លោក ជិន សុជា ម្ចាស់កសិដ្ឋាន​ បានស្នេីសុំ​ ឯកឧត្តមរដ្ឋមន្រ្តី​ ក្នុងការផ្តល់មេពូជត្រីកេះ​ និងត្រីឆ្លាំង​ សម្រាប់ដំណេីរការស្រាវជ្រាវ​ ពង្រីកអាជីវកម្មលេីការផលិតកូនត្រី​ ២ប្រភេទនេះ​ ដែលមានតម្រូវការទីផ្សារល្អ និងមានភាពធន់​ខ្ពស់។

ជាការឆ្លេីយតប​ ឯកឧត្តមរដ្ឋមន្ត្រី​ បានទទួលសំណេីរខាងលេីនេះ​ដោយឱ្យម្ចាស់កសិដ្ឋានសហការជាមួយ​ រដ្ឋបាលជលផល​ ក្នុងការទទួលបានមេពូជត្រី​ តាមចំនួនដែលត្រូវការ​ ចំនេញពេលវេលា​ និងដោះស្រាយបញ្ហាទឹកសម្រាប់ផលិតកម្ម​វារីវប្បកម្មផងដែរ។

លេីសពីនេះ​ ឯកឧត្តមរដ្ឋមន្ត្រី​ ផ្តល់អនុសាសន៍ណែនាំដល់ម្ចាស់កសិដ្ឋានត្រូវជំរុញការផ្សព្វផ្សាយពាណិជ្ជកម្មដេីម្បីលក់បានតម្លៃខ្ពស់​នូវផលិតផលវារីវប្បកម្ម​ និងអាចពិនិត្យលទ្ធភាពពង្រីកការវិនិយោគបន្ថែម​ដោយផ្តោតទៅលេីពូជដែលមានតម្លៃខ្ពស់ក្នុងទីផ្សារ​ សំដៅទទួលបានផលចំនេញសេដ្ឋកិច្ចពិតប្រាកដ៕