សាខាកាកបាទក្រហមខេត្តបន្ទាយមានជ័យប្រគល់ផ្ទះ​ ជូនគ្រួសារទីទ័លក្រ​ ចំនួន២គ្រួសារ​

អត្ថបទ៖ ម៉ា សុភាព

ខេត្តបន្ទាយមានជ័យ៖ នាព្រឹកថ្ងៃទី​ ៣១​ ខែមីនាឆ្នាំ២០២៤​ លោកអ៊ុ​ រាត្រី​ ប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យ​ បានអញ្ជើញក្នុងពិធីប្រគល់ផ្ទះថ្មីជូនបងប្អូនប្រជាពលរដ្ឋទីទាល់ក្រខ្វះទីជម្រកនៅស្រុកមង្គលបូរីខេត្តបន្ទាយមានជ័យចំនួន២គ្រួសារស្មើនឹងពីរខ្នងផ្ទះ ។ 

លោក​ ធូ​ សុីភ័ណ្ឌ​ នាយកប្រតិបត្តិសាខាកាកបាទក្រហមខេត្តបានឲ្យដឹងថា​ ក្រុមប្រតិបត្តិសាខាសហការជាមួយក្រុមអនុសាខាកាកបាទក្រហមស្រុកមង្គលបូរីបានចុះធ្វើការប៉ាន់ប្រមាណតម្រូវការរបស់គ្រួសារឈ្មោះ​ លឹម​ ស៊ីណា​ ភេទស្រីអាយុ​ ៤៤ឆ្នាំប្តី​ ឈ្មោះមឿន​ វណ្ណៈអាយុ​ ៤៥ជាលទ្ធផលគ្រួសារនេះរស់នៅក្នុងសភាពក្រីក្ររស់នៅអចិន្ត្រៃយ៍ក្នុងបន្ទប់មានកូនរហូតដល់ទៅ៨នាក់​ ស្រីចំនួន៤នាក់សរុបទាំងប្ដីប្រពន្ធទាំងអស់១០នាក់​ មុខរបរមិនពិតប្រាកដគ្រួសារនេះស្ថិតនៅក្នុងភូមិខ្លាខាំឆ្កែ​ ឃុំតាឡំ​ ស្រុកមង្គលបូរី។

ឯមួយគ្រួសារទៀតឈ្មោះ​ ពៅ​ សេក​ អាយុ​៨៣ឆ្នាំដែលជាជនចាស់ជរាក្រីក្រគ្មានទីពឹងរស់នៅក្នុងបន្ទប់ចំនួន​ ២នាក់ស្ថិតនៅក្នុងភូមិ​ផាសុីស្រាឃុំឫស្សីក្រោក​ ស្រុកមង្គលបូរី​ ។

ដោយពិនិត្យឃើញថាគ្រួសារទាំងពីរមានលក្ខណសម្បត្តិដែលសាខាកំណត់គឺជាគ្រួសារក្រីក្រខ្វះខាតជម្រកពិតប្រាកដណាស់ពួកគាត់មានដីសម្រាប់ ផ្ទះបានសាខាកាកបាទក្រហមខេត្តក៏បានចាប់ផ្ដើមរើសជាងដើម្បីសាងសង់ផ្ទះថ្មីជូនពួកគាត់ដែលមានទំហំ​ ៤ម៉ែត្របណ្តោយ​ ៧ម៉ែត្រកម្ពស់​៣,៨ម៉ែត្រ​ សង់ពីដែកប្រក់ស័ង្កសីជញ្ជាំងស័ង្កសី​ បាតស៊ីម៉ង់សង់ផ្ទាល់ដីព្រមទាំងសាងសង់បង្គន់អនាម័យបន្ថែម​ ដោយចំណាយថវិកាផ្ទះនីមួយនីមួយ ចំនួន​ ២៣៤៩ដុល្លារសហរដ្ឋអាមេរិក។

លោក អ៊ុំ រាត្រីបានមានប្រសាសន៍ថា​ ផ្ទះថ្មីទាំងនេះ​ ជាផ្ទះគ្រោះធម៌របស់សាខាកាកបាទក្រហមដែលមានលក្ខណៈរឹងមាំអាចកាត់បន្ថយភាពងាយរងគ្រោះបានមួយកម្រិត។ គិតត្រឹមមកដល់ពេលនេះសាខាកាកបាទក្រហមបានអនុវត្តសាងសង់ផ្ទះជូនដល់បងប្អូនចំនួន​២០ផ្ទះមកហើយ ។

ការអនុវត្តនៃគម្រោងសង់ផ្ទះថ្មីជូនគ្រួសារក្រីក្រខ្វះខាតជម្រកនេះពិតជាបានលើកកម្ពស់តម្លៃមនុស្សធម៌របស់កាកបាទក្រហមកម្ពុជា​ ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានដឹកនាំ។ 

ក្រៅពីប្រគល់ផ្ទះសាខាក៏បានផ្តល់នូវអំណោយមនុស្សធម៌បន្ថែម អង្ករ៥០គីឡូក្រាម​ ត្រីខ១យួរមី១កេស​ ទឹកត្រី១យួរ​ មុង១​ ភួយ១​ សារុង​១​ ក្រមា១​ ធុងទឹក១​ ឆ្នាំង២​ ចានបាយចំនួន៥​ ស្លាបព្រា៥​ កន្ទេល​ជ័រ១​ និងថវិកាមួយថវិកា​ មួយចំនួននិងប្រជាពលរដ្ឋទីទ័លក្រ​១០គ្រួសារក្នុងមួយគ្រួសារទទួលបានអង្ករម្ភៃ​ ២៥គីឡូក្រាម​ មី១កេស​ ត្រីខ១យួរទឹកត្រី​ ១យួរ​ មុង១​ ភួយ១​ ភួយ១​ សារុង១​ ក្រមា១និងថវិកាមួយចំនួន៕