អ៊ុយក្រែន និងកូរ៉េខាងត្បូង ពង្រឹងកិច្ចសហប្រតិបត្តិការដើម្បីទប់ទល់នឹងកូរ៉េខាងជើង

 ប្រភព៖ Reuters

កៀវ៖ ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅថ្ងៃអង្គារនេះថា លោកបានព្រមព្រៀងជាមួយប្រធានាធិបតីកូរ៉េខាងត្បូង លោក Yoon Suk Yeol ដើម្បីពង្រឹងទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរ ក្នុងគោលបំណងឆ្លើយតបទៅនឹងការចូលរួមរបស់កូរ៉េខាងជើង ក្នុងសង្រ្គាមនៅអ៊ុយក្រែន។

មេដឹកនាំទាំងពីរ បានឯកភាពគ្នាក្នុងការបង្កើនការផ្លាស់ប្តូរព័ត៌មានស៊ើបការណ៍ និងអ្នកជំនាញ ដើម្បីទប់ទល់នឹងការគំរាមកំហែងពីកូរ៉េខាងជើង។ លោក Zelenskiy បាននិយាយថា «ជាផ្នែកមួយនៃកិច្ចព្រមព្រៀងនេះ អ៊ុយក្រែននិងកូរ៉េខាងត្បូងនឹងផ្លាស់ប្តូរគណៈប្រតិភូក្នុងពេលឆាប់ៗនេះ ដើម្បីសម្របសម្រួលសកម្មភាព»។

ប្រធានាធិបតីអ៊ុយក្រែនរូបនេះ ក៏បានសម្តែងការសាទរចំពោះការគាំទ្ររបស់កូរ៉េខាងត្បូងចំពោះអ៊ុយក្រែន និងបាននិយាយថា លោករំពឹងថានឹងមានកិច្ចសហប្រតិបត្តិការរវាងប្រទេសទាំងពីរ កាន់តែជិតស្និទ្ធនាពេលអនាគត៕