អ្នកស្លាប់ក្នុងគ្រោះរអិលបាក់ដី នៅប្រទេសអេត្យូពី កើនឡើងដល់ ២៩៩នាក់

 ប្រភព៖ Reuters

អាឌីសអាបេបា៖ មន្រ្តីរដ្ឋាភិបាលបានឱ្យដឹងនៅថ្ងៃអង្គារសប្តាហ៍នេះថា ចំនួនអ្នកស្លាប់ក្នុងគ្រោះរអិលបាក់ដីចំនួន២លើក នៅឯភាគខាងត្បូងនៃប្រទេសអេត្យូពី បានកើនឡើងដល់២២៩នាក់ហើយ ខណៈការស្វែងរកអ្នកនៅមានជីវិតកំពុងបន្ត ចូលដល់ថ្ងៃទីពីរ។

ភ្លៀងធ្លាក់ខ្លាំងបង្កឱ្យមានបំណាក់ដី កប់មនុស្សជាប់នៅក្រោមនោះជាច្រើននាក់ ក្នុងតំបន់ Gofa ភាគខាងត្បូងប្រទេសអេត្យូពី កាលពីយប់ថ្ងៃអាទិត្យចុងសប្តាហ៍មុន ខណៈដែលបំណាក់ដីលើកទី​ពីរ ​បាន​វាយប្រហារអ្នក​ផ្សេង​ទៀត​ដែលចូលរួម​ជួយ​សង្រ្គោះ នៅ​ថ្ងៃ​ចន្ទដើមសប្តាហ៍។ យ៉ាងហោចណាស់មនុស្សចំនួន ៥០នាក់បន្ថែមទៀតបានស្លាប់ ដែលរួមមានកុមារ និងមន្រ្តីប៉ូលិសផងដែរ។

លោក Markos Melese ប្រធានទីភ្នាក់ងារគ្រោះមន្តរាយជាតិ និយាយថា «ខ្ញុំមិនដឹងពេលណាបញ្ចប់ទេ យើងកំពុងជីករកសាកសពនៅឡើយ»។ នាយករដ្ឋមន្រ្តីអេត្យូពី លោក Abiy Ahmed បានសម្តែងការសោកស្តាយ និងចូលរួមរំលែកទុក្ខ ហើយថាក្រុមមន្ត្រីសហព័ន្ធត្រូវបានដាក់ពង្រាយ ដើម្បីជួយដល់ប្រតិបត្តិការសង្រ្គោះគ្រោះមហន្តរាយ។

ប្រមុខនៃអង្គការសុខភាពពិភពលោក (WHO) លោក Tedros Adhanom Ghebreyesus បានឱ្យដឹងថាបុគ្គលិករបស់ WHO ត្រូវបានបញ្ជូនទៅជួយដល់តម្រូវការបន្ទាន់ផ្នែកសុខភាពនៅទីនោះ៕