បាឡុងផ្ទុកសំរាមរបស់កូរ៉េខាងជើង ធ្លាក់ក្នុងបរិវេណវិមានប្រធានាធិបតីកូរ៉េខាងត្បូង

 ប្រភព៖ AFP

សេអ៊ូល៖ ក្រុមមន្ត្រីសន្តិសុខកូរ៉េខាងត្បូងបាននិយាយថាបាឡុងផ្ទុកសំរាមមួយចំនួនបង្ហោះដោយកូរ៉េខាងជើង បានធ្លាក់ក្នុងបរិវេណ វិមានប្រធានាធិបតី នៅថ្ងៃពុធ ទី២៤ ខែកក្កដានេះ ដោយជំរុញឱ្យសេអ៊ូលដាក់ពង្រាយក្រុមអ្នកជំនាញខាងសារធាតុគីមី។

មន្ត្រីសន្តិសុខប្រចាំវិមានប្រធានាធិបតីកូរ៉េខាងត្បូងបាននិយាយថាក្រុមអ្នកជំនាញខាងសារធាតុគីមី ជីវសាស្ត្រ និងសារធាតុវិទ្យុសកម្ម បានប្រមូលបាឡុងសំរាម ទាំងនោះដោយសុវត្ថិភាព ហើយក្រោយការវិភាគ ជាលទ្ធផលបញ្ជាក់ថាមិនមានសារធាតុគ្រោះថ្នាក់ ឬសារធាតុចម្លងជំងឺណាមួយត្រូវបានរកឃើញនោះទេ។

នេះជាលើកដំបូងបំផុត ដែលបាឡុងផ្ទុកសំរាមរបស់កូរ៉េខាងជើង ធ្លាក់ក្នុងបរិវេណការិយាល័យមេដឹកនាំកូរ៉េខាងត្បូងក្នុងទីក្រុងសេអ៊ូល ដែលត្រូវបានការពារយ៉ាងមាំទាំ ដោយទាហានជាច្រើន និងជាតំបន់គ្មានការហោះហើរ ចាប់តាំងពីទីក្រុងព្យុងយ៉ាង ផ្ដើមធ្វើយុទ្ធនាការបោះបង្ហោះបាឡុងសណ្ដោងសំរាមចូលដីកូរ៉េខាងត្បូង កាលពីខែឧសភា មក។

បើតាមយោធាកូរ៉េខាងត្បូងបានឱ្យដឹងថាកូរ៉េខាងជើង បានបង្ហោះបាឡុងចូលដីកូរ៉េខាងត្បូងសាជាថ្មី ខណៈអាជ្ញាធរទីក្រុងសេអ៊ូលចេញសារអាសន្ន នៅព្រឹកថ្ងៃពុធនេះជាមួយការព្រមានកុំឱ្យប៉ះពាល់បាឡុងទាំងនោះឱ្យសោះ ហើយបើប្រទះឃើញត្រូវរាយការណ៍ជូនអាជ្ញាធរ៕