ទេសរដ្ឋមន្រ្តី គន់ គីម ចុះពិនិត្យទីតាំងដីសម្បទានសង្គមកិច្ច សាងសង់ផ្ទះជូនអតីតយុទ្ធជន និងនិវត្តជននៅខេត្តស្ទឹងត្រែង

ខេត្តស្ទឹងត្រែង៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធជន និងនិវត្តជនកម្ពុជា នៅរសៀលថ្ងៃទី៧ ខែសីហា ឆ្នាំ២០២៦ បានអញ្ជើញចុះត្រួតពិនិត្យសកម្មភាពក្រុមការងារឈូសឆាយដីសម្រាប់ត្រៀមសាងសង់ផ្ទះជូនអតីតយុទ្ធជន និងនិវត្តជន នៅទីតាំងដីសម្បទានសង្គមកិច្ច ស្ថិតក្នុងភូមិខាំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។

ការចុះពិនិត្យនេះ គឺដើម្បីអនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា ស្តីពីផែនការសកម្មភាពសាងសង់ផ្ទះជូនអតីតយុទ្ធជន និងនិវត្តជន។ លោក គន់ គីម បានបញ្ជាក់ថា គណៈកម្មាធិការកណ្តាលសមាគម និងគណៈកម្មាធិការសមាគមខេត្ត បានចុះពិនិត្យទីតាំងដីសម្បទានសង្គមកិច្ចនេះ ដើម្បីសាងសង់ផ្ទះជូនបងប្អូនអតីតយុទ្ធជន និងនិវត្តជន។

តាមរយៈរបាយការណ៍ពិនិត្យជាក់ស្តែង ចំនួនគ្រួសារអតីតយុទ្ធជន និងនិវត្តជនដែលត្រូវសាងសង់ផ្ទះជូនមានរហូតដល់ ១២៤ខ្នង។

ទេសរដ្ឋមន្រ្តី គន់ គីម បានប្តេជ្ញាខិតខំកៀគរថវិកា ដើម្បីឱ្យការសាងសង់សម្រេចបានជោគជ័យ តាមសំណើស្ថិតិជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត។ ជាមួយគ្នានេះ ឯកឧត្តមទេសរដ្ឋមន្រ្តីក៏បានសំណូមពរដល់ប្រជាពលរដ្ឋដែលបានទន្ទ្រានលើទីតាំងដីដែលរាជរដ្ឋាភិបាលផ្តល់ឱ្យសមាគមអតីតយុទ្ធជន និងនិវត្តជនកម្ពុជា សូមមេត្តាប្រគល់ជូនសមាគមវិញ ដើម្បីប្រើប្រាស់សម្រាប់សាងសង់ផ្ទះជូនអតីតយុទ្ធជន និងនិវត្តជន។

សូមជម្រាបថា បច្ចុប្បន្ន ខេត្តស្ទឹងត្រែង មានអតីតយុទ្ធជនចំនួន ១,៥៥០នាក់ និងនិវត្តជនចំនួន ៣៨៨នាក់ ដែលក្នុងនោះមានអតីតយុទ្ធជន ៩៤នាក់ អត់ផ្ទះតែមានដី, ២៤នាក់ អត់ដីអត់ផ្ទះ, ៣២នាក់ មានផ្ទះមិនសមរម្យ និងនិវត្តជន ៤នាក់ អត់ដីអត់ផ្ទះ។ គម្រោងសាងសង់ផ្ទះនេះ នឹងរួមចំណែកយ៉ាងសំខាន់ក្នុងការលើកកម្ពស់ជីវភាព និងផ្តល់ភាពកក់ក្តៅដល់អតីតយុទ្ធជន និងនិវត្តជន ដែលបានលះបង់ដើម្បីជាតិមាតុភូមិ៕