អាជ្ញាធរឃុំ-សង្កាត់ក្នុងខេត្តកំពត លើកឡើងពីភាពមិនប្រក្រតីនៃការដេញថ្លៃមូលនិធិ ស្ទើរទូទាំង ៩៣ ឃុំ-សង្កាត់

អត្ថបទ៖ ទ្រី ហៀន
​

ខេត្តកំពត៖ តំណាងអាជ្ញាធរមូលដ្ឋាន រួមមានមេឃុំ ចៅសង្កាត់ និងសមាជិកក្រុមប្រឹក្សាឃុំ-សង្កាត់ជាច្រើនរូប ក្នុងខេត្តកំពត ដោយសុំមិនបង្ហាញអត្តសញ្ញាណ បានសម្តែងការព្រួយបារម្ភយ៉ាងខ្លាំង និងបានទទូចសុំកិច្ចអន្តរាគមន៍ជាបន្ទាន់ពីក្រសួងសាម៉ី និងមន្ទីរជំនាញពាក់ព័ន្ធ តាមរយៈបណ្តាញសារព័ត៌មាន ដើម្បីចុះធ្វើអធិការកិច្ចស្រាវជ្រាវលើភាពមិនប្រក្រតី ជុំវិញដំណើរការដេញថ្លៃគម្រោងអភិវឌ្ឍន៍មូលនិធិឃុំ-សង្កាត់ (ផ្លូវបេតុង និងផ្លូវលំ) ទាំង ៩៣ ឃុំ-សង្កាត់ ទូទាំងខេត្ត។

តាមការគូសបញ្ជាក់ពីតំណាងអាជ្ញាធរមូលដ្ឋាន ដំណើរការដេញថ្លៃនាពេលកន្លងមក ត្រូវបានគេសង្កេតឃើញថាមានភាពខ្វះតម្លាភាព និងមិនបានឆ្លុះបញ្ចាំងពីការប្រកួតប្រជែងដោយសេរី និងយុត្តិធម៌នោះឡើយ។ កត្តានេះបានបណ្តាលឱ្យក្រុមហ៊ុនទទួលការដែលឈ្នះការដេញថ្លៃ ធ្វើសកម្មភាពសង់ផ្លូវមិនគ្រប់ស្តង់ដារបច្ចេកទេស និងគ្មានគុណភាព ផ្ទុយពីគោលការណ៍ណែនាំស្តីពីការគ្រប់គ្រងហិរញ្ញវត្ថុឃុំ-សង្កាត់។

មេឃុំ និងក្រុមប្រឹក្សាឃុំ-សង្កាត់ សម្តែងការទាល់ច្រកដោយបញ្ជាក់ថា ពួកគាត់មានសិទ្ធិត្រឹមតែ "ទទួលយក" លទ្ធផលនៃការដេញថ្លៃប៉ុណ្ណោះ ដោយគ្មានលទ្ធភាពបដិសេធ ឬកែប្រែអ្វីបានឡើយ បើទោះបីជាដឹងយ៉ាងច្បាស់ថា គម្រោងអភិវឌ្ឍន៍ទាំងនោះគ្មានប្រសិទ្ធភាព និងមិនឆ្លើយតបនឹងតម្រូវការគុណភាពពិតប្រាកដក៏ដោយ។

ពួកគាត់បានលើកឡើងថា ការអនុវត្តគម្រោងដែលខ្វះតម្លាភាព នាំឱ្យខាតបង់ថវិកាអភិវឌ្ឍន៍ថ្នាក់ក្រោមជាតិ ហើយផ្លូវដែលស្ថាបនាហើយ ឆាប់ខូចខាតទៅវិញក្នុងរយៈពេលខ្លី បង្កផលប៉ះពាល់ដល់ជីវភាព និងការធ្វើដំណើររបស់ប្រជាពលរដ្ឋ។

អាជ្ញាធរមូលដ្ឋានបានស្នើសុំយ៉ាងទទូចឱ្យ ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ព្រមទាំងអាជ្ញាធរអធិការកិច្ចជាតិ ចុះធ្វើការអង្កេត និងស្រាវជ្រាវស៊ីជម្រៅលើដំណើរការដេញថ្លៃ និងគុណភាពសំណង់នៃគម្រោងផ្លូវមូលនិធិឃុំ-សង្កាត់ទាំង ៩៣ ក្នុងខេត្តកំពត ជាប្រញាប់។

ការស្វែងរកអន្តរាគមន៍ថ្នាក់ជាតិនេះ រំពឹងថានឹងជួយកែទម្រង់ប្រព័ន្ធគ្រប់គ្រង និងដេញថ្លៃមូលនិធិថ្នាក់ក្រោមជាតិ ឱ្យមានគណនេយ្យភាព សារពើពន្ធច្បាស់លាស់ និងធានាថា រាល់រៀលនៃថវិកាជាតិ ត្រូវ បានប្រើប្រាស់ដើម្បីផលប្រយោជន៍យូរអង្វែងរបស់ប្រជាពលរដ្ឋនៅមូលដ្ឋានពិតប្រាកដ៕