បទវិភាគ៖ ឆ្ពោះទៅរកភាពថ្មី គុណភាពល្អនិងភាពល្អប្រសើរ សេដ្ឋកិច្ចចិនបន្តដើរទៅមុខកាន់តែឆ្ងាយនិងកាន់តែរឹងមាំ
បរទេស៖ "តម្លៃបន្ថែមនៃឧស្សាហកម្មធុនធំនិងមធ្យមនៅទូទាំងប្រទេសចិនកើនឡើង៥,៣% បើប្រៀបធៀបនឹងរយៈពេលដូចគ្នានាឆ្នាំមុន" "ទំហំសរុបនៃការនាំចេញ-នាំចូលទំនិញកើនឡើង១៧,៣% បើប្រៀបធៀបនឹងរយៈពេលដូចគ្នានាឆ្នាំមុន" "បរិមាណផលិតមនុស្សយន្តឧស្សាហកម្មកើនឡើង២៨,៥% បើប្រៀបធៀបនឹងរយៈពេលដូចគ្នានាឆ្នាំមុន"...តាមទិន្នន័យដែលចេញផ្សាយដោយរដ្ឋបាលជាតិស្ថិតិចិនកាលពីថ្ងៃទី ១៧ ខែសីហាឱ្យដឹងថា៖ ក្នុងរយៈពេល៧ខែដើមឆ្នាំនេះ តម្លៃបន្ថែមនៃឧស្សាហកម្មធុនធំនិងមធ្យមនៅទូទាំងប្រទេសចិនបានកើនឡើង៥,៣% បើប្រៀបធៀបនឹងរយៈពេលដូចគ្នានាឆ្នាំមុន សន្ទស្សន៍ផលិតកម្មនៃឧស្សាហកម្មសេវាកម្មនៅទូទាំងប្រទេសចិនបានកើនឡើង៤,៧% បើប្រៀបធៀបនឹងរយៈពេលដូចគ្នានាឆ្នាំមុន ទំហំសរុបនៃការនាំចេញ-នាំចូលទំនិញបានកើនឡើង១៧,៣%បើប្រៀបធៀបនឹងរយៈពេលដូចគ្នានាឆ្នាំមុន ហើយទំហំសរុបនៃការលក់រាយទំនិញប្រើប្រាស់និងសេវាកម្មក្នុងសង្គមបានកើនឡើង២,៦% បើប្រៀបធៀបនឹងរយៈពេលដូចគ្នានាឆ្នាំមុន ដូច្នេះ សេដ្ឋកិច្ចជាតិចិនរក្សាបាននូវស្ថិរភាពជាទូទៅនិងនិន្នាការឆ្ពោះទៅរកភាពថ្មីនិងគុណភាពល្អ ។
នៅឆមាសទីមួយឆ្នាំនេះ ផលិតផលក្នុងស្រុកសរុប(GDP)របស់ចិនបានកើនឡើង៤,៧%បើប្រៀបធៀបនឹងរយៈពេលដូចគ្នានាឆ្នាំមុន ដែលស្របតាមគោលដៅរំពឹងទុកនៃកំណើនសេដ្ឋកិច្ចប្រចាំឆ្នាំ សេដ្ឋកិច្ចចិនបានដើរទៅមុខក្រោមសម្ពាធ ដោយបង្ហាញពីភាពធន់និងកម្លាំងរស់រវើកយ៉ាងខ្លាំង ។កាលពីថ្ងៃទី ៣០ ខែកក្កដា លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិនបានអញ្ជើញជាអធិបតីក្នុងកិច្ចប្រជុំនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន ។ កិច្ចប្រជុំលើកនេះបានលើកឡើងថា “នឹងជំរុញឱ្យសេដ្ឋកិច្ចចិនបន្តឆ្ពោះទៅរកភាពថ្មី គុណភាពល្អនិងភាពល្អប្រសើរ ហើយខិតខំសម្រេចបាននូវការចាប់ផ្តើមល្អនៃការអនុវត្តផែនការអភិវឌ្ឍន៍ជាតិ៥ឆ្នាំទី១៥”។ ឆ្លងតាមរយៈពាក្យគន្លឹះទាំងបីគឺ"ឆ្ពោះទៅរកភាពថ្មី" "ឆ្ពោះទៅរកគុណភាពល្អ"និង"ឆ្ពោះទៅរកភាពល្អប្រសើរ" យើងអាចយល់ដឹងពីទិសដៅ ការងារសំខាន់ៗនិងតក្កវិជ្ជាអភិវឌ្ឍន៍នៃសេដ្ឋកិច្ចចិននៅឆមាសទីពីរ ។
កម្លាំងចលករឆ្ពោះទៅរកភាពថ្មីគឺជាចំណុចលេចធ្លោនៃសេដ្ឋកិច្ចចិននាពេលបច្ចុប្បន្ន ។ នៅឆមាសទីមួយឆ្នាំនេះ ការនាំចេញ"ផលិតផលថ្មីបីប្រភេទ"(គឺរថយន្តអគ្គិសនី អាគុយលីចូមនិងផលិតផលសូឡា)របស់ចិនបានកើនឡើង៤៦,១% បើប្រៀបធៀបនឹងរយៈពេលដូចគ្នានាឆ្នាំមុន ។ ការនាំចេញសៀគ្វីរួមបញ្ចូលគ្នាដែលគិតថ្លៃតាមប្រាក់យាន់ចិនបានកើនឡើង៨៨,៧% បើប្រៀបធៀបនឹងរយៈពេលដូចគ្នានាឆ្នាំមុន ការនាំចេញមនុស្សយន្តវះកាត់បានកើនឡើង៣,៣ដងបើប្រៀបធៀបនឹងរយៈពេលដូចគ្នានាឆ្នាំមុន ហើយទំហំសរុបនៃការផ្តល់អាជ្ញាប័ណ្ណបច្ចេកវិទ្យាឱសថច្នៃប្រឌិតថ្មីទៅកាន់ក្រៅប្រទេសមានចំនួនប្រហែល១១០ពាន់លានដុល្លារអាមេរិក...នៅក្នុងបញ្ជីនាំចេញទំនិញនៃពាណិជ្ជកម្មអន្តរជាតិ មាន"ភាពថ្មី"កាន់តែច្រើនឡើងៗ ។
រចនាសម្ព័ន្ធឆ្ពោះទៅរកគុណភាពខ្ពស់ គឺជាបម្រែបម្រួលដ៏វិជ្ជមាននៃសេដ្ឋកិច្ចចិននាពេលបច្ចុប្បន្ន ។ នៅឆមាសទីមួយឆ្នាំនេះ ចំណូលពីការលក់សេវាកម្មទេសចរណ៍និងកម្សាន្តសប្បាយបានកើនឡើង១២,៣% បើប្រៀបធៀបនឹងរយៈពេលដូចគ្នានាឆ្នាំមុន ហើយសមាមាត្រនៃការចំណាយខាងសេវាកម្មប្រើប្រាស់ក្នុងមនុស្សម្នាក់ៗក្នុងការចំណាយប្រើប្រាស់សរុបរបស់ប្រជាជនចិនបានកើនឡើង០,២ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ។ ទីផ្សារប្រើប្រាស់របស់ចិនកំពុងបោះជំហានទៅកាន់ដំណាក់កាលថ្មីដែលផ្តោតសំខាន់ស្មើគ្នាដល់ "ទំនិញ+ សេវាកម្ម" ហើយការប្រើប្រាស់ខាងសេវាកម្មបានក្លាយជាក្បាលម៉ាស៊ីនដ៏សំខាន់ក្នុងការជំរុញកំណើននៃការប្រើប្រាស់ ។
មូលដ្ឋានគ្រឹះឆ្ពោះទៅរកភាពល្អប្រសើរ គឺជានិន្នាការរយៈពេលវែងនៃសេដ្ឋកិច្ចចិន ។ បើចង់ជំរុញសេដ្ឋកិច្ចចិនឱ្យបន្តឆ្ពោះទៅរកភាពល្អប្រសើរ នោះ ត្រូវប្រើប្រាស់ឱ្យបានល្អនូវឱកាសនិងឧត្តមភាពផ្សេងៗ ដើម្បីឆ្លើយតបប្រកបដោយប្រសិទ្ធភាពនូវផលប៉ះពាល់ពីខាងក្រៅនិងការលំបាកនៅផ្ទៃក្នុង ហើយជំរុញការអភិវឌ្ឍប្រកបដោយគុណភាពខ្ពស់ឱ្យដើរទៅមុខកាន់តែឆ្ងាយនិងកាន់តែរឹងមាំ ។ បច្ចុប្បន្ននេះ ចិននៅតែជា"យុថ្កាស្ថិរភាព"នៃសេដ្ឋកិច្ចសកលដដែល ។ ខណៈពេលដែលសម្រួលបញ្ចុះការប៉ាន់ប្រមាណចំពោះកំណើនសេដ្ឋកិច្ចសកល អង្គការមូលនិធិរូបិយវត្ថុអន្តរជាតិ(IMF)និងធនាគារពិភពលោកបាននាំគ្នាបោះឆ្នោតផ្តល់ទុកចិត្តដល់សេដ្ឋកិច្ចចិន ។
នៅឆ្នាំដំបូងនៃការអនុវត្ត“ផែនការអភិវឌ្ឍន៍ជាតិ៥ឆ្នាំទី១៥” សេដ្ឋកិច្ចចិនមានការអភិវឌ្ឍដោយនឹងនរ ហើយកម្លាំងជាក់ស្តែងរបស់ខ្លួនកំពុងកើនឡើងជាបន្តបន្ទាប់ ។ សមាមាត្រនៃតម្លៃបន្ថែមនៃឧស្សាហកម្មកម្មន្តសាលក្នុងផលិតផលក្នុងស្រុកសរុប(GDP)បានឡើងដល់២៦,២% ហើយហេដ្ឋារចនាសម្ព័ន្ធបណ្តាញគឺធំជាងគេ និងទូលំទូលាយបំផុតនៅលើពិភពលោក ដែលផ្តល់មូលដ្ឋានគ្រឹះដ៏រឹងមាំនិងការគាំទ្រដ៏ខ្លាំងក្លាសម្រាប់សេដ្ឋកិច្ចចិនក្នុងការទប់ទល់នឹងហានិភ័យនិងដើរទៅមុខប្រកបដោយស្ថិរភាព ។
មិនអាចបដិសេធបានទេថា បច្ចុប្បន្ននេះ ការអភិវឌ្ឍសេដ្ឋកិច្ចរបស់ចិនកំពុងប្រឈមនឹងការលំបាកនិងការសាកល្បងមួយចំនួន ។ ប៉ុន្តែគួរមើលឃើញថា សេដ្ឋកិច្ចចិនមានមូលដ្ឋានគ្រឹះដ៏នឹងនរ មានឧត្តមភាពច្រើននិងមានភាពធន់ដ៏ខ្លាំងក្លា ហើយលក្ខខណ្ឌគាំទ្រនិងនិន្នាការល្អប្រសើរដែលមានស្ថិរភាពក្នុងរយៈពេលយូរគឺមិនកែប្រែទេ ។ សេដ្ឋកិច្ចចិនកំពុងឆ្ពោះទៅរកភាពថ្មីនិងគុណភាពខ្ពស់ នឹងបន្តពង្រឹងនិន្នាការល្អប្រសើរក្នុងការអភិវឌ្ឍប្រកបដោយស្ថិរភាព ៕
Post a Comment