មន្ទីររៀបចំដែនដីខេត្តកែប ប្រជុំពិភាក្សា និងជំរុញការដោះស្រាយបញ្ហាព្រំប្រទល់រដ្ឋបាល ខេត្ត ក្រុង ស្រុក ឃុំ សង្កាត់

 អត្ថបទ៖ ទ្រី ហៀន

ខេត្តកែប៖ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកែប នារសៀលថ្ងៃចន្ទ ទី១៧ ខែសីហា ឆ្នាំ២០២៦ មានរៀបចំកិច្ចប្រជុំជំរុញការដោះស្រាយបញ្ហាព្រំប្រទល់រដ្ឋបាល ខេត្ត ក្រុង ស្រុក ឃុំ សង្កាត់។

កិច្ចប្រជុំនេះប្រព្រឹត្តទៅ ក្រោមអធិបតីភាពដ៏ខ្ពង់ខ្ពស់របស់ លោក អ៊ឹម បញ្ញារិទ្ធិ អភិបាលរង នៃគណៈអភិបាលខេត្តកែប មិងមានការអញ្ជើញចូលរួមពីសំណាក់ថ្នាក់ដឹកនាំមន្ទីរ-អង្គភាពជំនាញ តំណាងអាជ្ញាធរក្រុង ស្រុក ឃុំ សង្កាត់ និងមន្ត្រីពាក់ព័ន្ធជាច្រើនរូប។
​

កិច្ចប្រជុំធ្វើឡើងដើម្បីពិនិត្យលើវឌ្ឍនភាព ការងារសម្របសម្រួល និងបញ្ហាប្រឈមនៃព្រំប្រទល់រដ្ឋបាលនានានាពេលកន្លងមក។ ផ្ទៀងផ្ទាត់ទិន្នន័យផែនទី និងការវាស់វែងជាក់ស្តែង ដើម្បីធានាភាពច្បាស់លាស់ ត្រឹមត្រូវ និងកាត់បន្ថយទំនាស់ដីធ្លី។ពន្លឿនការកំណត់ព្រំប្រទល់រដ្ឋបាល ដើមបីងាយស្រួលដល់ការគ្រប់គ្រងដែនដី និងការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព។

មានប្រសាសន៍ក្នុងឱកាសនោះ លោក អ៊ឹម បញ្ញារិទ្ធិ បានណែនាំដល់អាជ្ញាធរ និងមន្ត្រីជំនាញទាំងអស់ ត្រូវបន្តសហការគ្នាឱ្យបានជិតស្និទ្ធ ដោយឈរលើស្មារតីទទួលខុសត្រូវខ្ពស់ និងផ្អែកលើផលប្រយោជន៍រួមរបស់ប្រជាពលរដ្ឋជាធំ៕