សម្តេចបវរធិបតី ហ៊ុន ម៉ាណែត ស្វាគមន៍ចំពោះការបើកបណ្តុះបណ្តាលវិជ្ជាជីវៈ និងបច្ចេកទេស នៅតាមសាលាឯកជននានា

ខេត្តសៀមរាប៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ស្វាគមន៍ចំពោះការបើកបណ្តុះបណ្តាលជំនាញវិជ្ជាជីវៈ និងបច្ចេកទេស(TVET)នៅតាមសាលាឯកជននានា ដែលជាការចូលរួមជាមួយក្រសួងការងារ និងបណ្តុះបណ្តាវិជ្ជាជីវៈ។ 

ការលើកឡើងរបស់សម្ដេចធិបតី បែបនេះ ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ South-East Asia នាព្រឹកថ្ងៃទី២១ ខែកក្កដា ឆ្នាំ២០២៦ នៅសណ្ឋាគារសុខា ខេត្តសៀមរាប។

ក្នុងឱកាសនោះ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា៖ «ខ្ញុំស្វាគមន៍ចំពោះការខិតខំរៀបចំបន្ថែម បើកវិស័យបណ្តុះបណ្តាលវិជ្ជាជីវៈ និងបច្ចេក(TVET) ពីវិស័យឯកជន រួមជាមួយក្រសួងការងារ ដើម្បីបង្កើតឱកាសគុណភាព សមត្ថភាពដល់ប្រជាពលរដ្ឋ ដែលយុវជន មានឱកាសរៀនសូត្រ»។ សម្តេចធិបតីបានលើកឡើងថា នេះជាការផ្តល់ឱកាស និងបើកចំហចក្ខុវិស័យសម្រាប់រាជរដ្ឋាភិបាល ក្នុងការធ្វើយ៉ាងណាធានាគុណភាព។ សម្តេចធិបតីនាយករដ្ឋមន្រ្ដីក៏ស្នើសុំដល់សាលាឯកជនទាំងអស់ កុំធ្វើ ការប្រកួតប្រជែងគ្នាដោយយកតែបរិមាណ ត្រូវធ្វើយ៉ាងណាឱ្យសិស្សមានសមត្ថភាពគ្រប់គ្រាន់ មុនចេញពីសាលា។

ជាមួយគ្នានេះ សម្តេចធិបតីនាយករដ្ឋមន្ត្រីក៏បានបន្ថែមថា ការធានាគុណភាពពិតប្រាកដ ការពង្រីក ការងារត្រូវមានសមត្ថភាព ក្នុងនោះ ការវិនិយោគនៅក្នុងសុខាភិបាលជារឿងសំខាន់ ហើយយើងក៏ស្វាគមន៍ចំពោះការចូលរួមពីវិស័យឯកជន ទាំងក្នុង និងក្រៅប្រទេស ផងដែរ៕