មូលនិធិគន្ធបុប្ផាកម្ពុជា ប្រកាសពីការទទួលបានថវិកាជាង ៦.៣លានដុល្លារ ក្នុងយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦

ភ្នំពេញ៖ មូលនិធិគន្ធបុប្ផាកម្ពុជា បានប្រកាសពីលទ្ធផលដ៏ត្រចះត្រចង់នៃយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ ដែលបានប្រព្រឹត្តទៅពេញមួយខែមិថុនា ដោយទទួលបានថវិកាបរិច្ចាគសរុបប្រមាណ ៦,៣៨២,០០០ ដុល្លារអាម៉េរិក ពីសំណាក់សប្បុរសជនជាង ៣៥ម៉ឺននាក់។ នេះបើយោងតាមសេចក្តីប្រកាសព័ត៌មានរបស់មូលនិធិគន្ធបុប្ផាកម្ពុជា នាថ្ងៃទី០១ ខែកក្កដា ឆ្នាំ២០២៦។

យុទ្ធនាការដ៏មានសារៈសំខាន់នេះត្រូវបានដឹកនាំដោយផ្ទាល់ពីសំណាក់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា។ ភាពជោគជ័យនេះបានឆ្លុះបញ្ចាំងពីស្មារតី «ខ្មែរជួយខ្មែរ» ដ៏រឹងមាំ និងមហាចលនាសប្បុរសធម៌ដ៏ផុសផុលរបស់ប្រជាជនកម្ពុជា ដើម្បីរួមគ្នានាំក្តីសង្ឃឹម និងភាពញញឹមដល់ទារក កុមារ និងស្ត្រីមានផ្ទៃពោះនៅកម្ពុជា។ ការចូលរួមយ៉ាងសកម្មពីសំណាក់សប្បុរសជនរាប់សែននាក់ បានបង្ហាញឱ្យឃើញពីការយកចិត្តទុកដាក់ និងការគាំទ្រយ៉ាងពេញទំហឹងចំពោះបេសកកម្មមនុស្សធម៌របស់មន្ទីរពេទ្យគន្ធបុប្ផា។

ថវិកាដែលទទួលបានពីយុទ្ធនាការនេះ នឹងរួមចំណែកយ៉ាងសំខាន់ក្នុងការរក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផា ទាំងនៅរាជធានីភ្នំពេញ និងនៅខេត្តសៀមរាប។ មន្ទីរពេទ្យគន្ធបុប្ផាបានបន្តបេសកកម្មដ៏ថ្លៃថ្លារបស់ខ្លួនក្នុងការពិនិត្យ និងព្យាបាលជំងឺទារក និងកុមារនៅកម្ពុជា ដោយឥតគិតថ្លៃ ប្រកបដោយគុណភាពខ្ពស់ និងមិនមានការរើសអើង។ លើសពីនេះ មន្ទីរពេទ្យក៏បានផ្តល់សេវាសម្ភពដ៏ចាំបាច់សម្រាប់ស្ត្រីមានផ្ទៃពោះផងដែរ ដែលជាការរួមចំណែកដ៏ធំធេងដល់សុខុមាលភាពសាធារណៈ។

ទោះបីជាយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ បានឈានដល់ទីបញ្ចប់ក៏ដោយ ក៏មូលនិធិគន្ធបុប្ផាកម្ពុជាបានជម្រាបជូនសាធារណជនថា សប្បុរសជននៅតែអាចបន្តចូលរួមបរិច្ចាគបានជានិច្ច ដើម្បីគាំទ្រដល់កិច្ចការមនុស្សធម៌នេះ។ ការបរិច្ចាគទោះតិចក្តីច្រើនក្តី សុទ្ធតែមានតម្លៃក្នុងការជួយសង្គ្រោះជីវិតទារក កុមារ និងស្ត្រីមានផ្ទៃពោះ។ ស្មារតី «ខ្មែរជួយខ្មែរ» គឺជាកម្លាំងចលករដ៏សំខាន់ដែលធ្វើឱ្យមន្ទីរពេទ្យគន្ធបុប្ផាអាចបន្តផ្តល់សេវាដ៏មានតម្លៃទាំងនេះបាន។

ក្នុងឱកាសនេះ មូលនិធិគន្ធបុប្ផាកម្ពុជា បានថ្លែងអំណរគុណយ៉ាងជ្រាលជ្រៅបំផុតជូនចំពោះលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំពោះការលះបង់ពេលវេលាដ៏មានតម្លៃ និងការដឹកនាំប្រកបដោយគតិបណ្ឌិតក្នុងយុទ្ធនាការនេះ។ មូលនិធិក៏បានថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ ក្រសួង-ស្ថាប័ន រដ្ឋបាលរាជធានី-ខេត្ត និងភាគីពាក់ព័ន្ធទាំងអស់ ដែលបានផ្តល់កិច្ចសហការ និងការគាំទ្រយ៉ាងពេញទំហឹង។ ការរួមចំណែកទាំងអស់នេះ គឺជាកត្តាគន្លឹះដែលធ្វើឱ្យយុទ្ធនាការនេះប្រព្រឹត្តទៅដោយរលូន និងទទួលបានលទ្ធផលគួរជាទីមោទនៈ៕