ចិនគ្រោងផ្តល់ជំនួយមនុស្សធម៌ដល់បណ្តាប្រទេសមជ្ឈិមបូព៌ា ដែលរងគ្រោះព្រោះតែសង្រ្គាម

ប៉េកាំង៖ នាថ្ងៃអង្គារ ទី១៧ ខែមីនា ចិនបាននិយាយថា ខ្លួននឹងផ្តល់ជំនួយមនុស្សធម៌ដល់បណ្តាប្រទេសនៅមជ្ឈិមបូព៌ា រួមមានទាំងអ៊ីរ៉ង់និងលីបង់ ដែលបានរងគ្រោះ ក្នុងសង្រ្គាមបង្កឡើងដោយសហរដ្ឋអាមេរិកនិងអ៊ីស្រាអែល តាំងពីចុងខែមុន។

អំឡុងសន្និសីទសារព័ត៌មាននៅទីក្រុងប៉េកាំង អ្នកនាំពាក្យក្រសួងការបរទេសចិន លោក Lin Jian បានលើកឡើងដូច្នេះថា «ប្រទេសចិនបានសម្រេចផ្តល់ជំនួយមនុស្សធម៌បន្ទាន់ ដល់ប្រទេសអ៊ីរ៉ង់ លីបង់ អ៊ីរ៉ាក់ និងហ៊្សកដានី ក្រោមក្តីសង្ឃឹមថា វានឹងអាចជួយសម្រាលទុក្ខលំបាកផ្នែកមនុស្សធម៌ ដែលប្រជាជននៅក្នុងប្រទេសទាំងនោះ កំពុងតែប្រឈមមុខ»។

សូមជម្រាបថា កាលពីសប្តាហ៍មុន កាកបាទក្រហមចិន ក៏បានប្រកាសផ្តល់ជំនួយមនុស្សធម៌ ២០០០០០ដុល្លារផងដែរ ដល់អ៊ីរ៉ង់ ដើម្បីជួយគ្រួសាររបស់ជនរងគ្រោះ ក្នុងករណីវាយប្រហារចំសាលារៀនស្លាប់មនុស្សជាច្រើននាក់ អំឡុងថ្ងៃដំបូងនៃយុទ្ធនាការយោធាអាមេរិក-អ៊ីស្រាអែល។ សង្រ្គាមដែលកំពុងឆាបឆេះរាលដាលទូទាំងតំបន់មជ្ឈិមបូព៌ា បានផ្ទុះឡើងកាលពីថ្ងៃទី២៨ ខែកុម្ភៈ នៅពេលអាមេរិករួមដៃជាមួយអ៊ីស្រាអែល បើកការវាយប្រហារលើអ៊ីរ៉ង់ ជាហេតុនាំឱ្យអ៊ីរ៉ង់សងសឹកវិញ៕ (AFP)