ហ្សេលេនស្គី៖ អ្នកជំនាញទប់ទល់ដ្រូនជាង២០០នាក់របស់អ៊ុយក្រែន ត្រូវបានដាក់ពង្រាយនៅមជ្ឈិមបូព៌ា

ឡុងដ៍៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃអង្គារ ទី១៧ ខែមីនា បាននិយាយថា អ្នកជំនាញយោធា​ផ្នែកប្រយុទ្ធប្រឆាំងយន្តហោះដ្រូនរបស់អ៊ុយក្រែន ចំនួន២០១នាក់ កំពុងស្ថិតនៅមជ្ឈិមបូព៌ា ដើម្បីការពារតំបន់នេះពីការវាយប្រហារ​របស់យន្តហោះដ្រូនអ៊ីរ៉ង់ Shahed ហើយ៣៤នាក់ទៀត ត្រៀមលក្ខណៈជាស្រេច ដើម្បីដាក់ពង្រាយបន្ថែម។

ថ្លែងនៅសភាចក្រភពអង់គ្លេស អំឡុងទស្សនកិច្ច លោកប្រធានាធិបតីអ៊ុយក្រែន បាននិយាយយ៉ាងដូច្នេះថា «ទាំងនេះគឺជាអ្នកជំនាញយោធា ដែលដឹងច្បាស់ពីរបៀបជួយ... ពីរបៀបការពារប្រឆាំងដ្រូន Shahed។ ក្រុមការងាររបស់យើង កំពុងស្ថិតនៅរួចស្រេចក្នុងប្រទេសអេមីរ៉ាតអារ៉ាប់រួម កាតា អារ៉ាប៊ីសាអូឌីត និងកំពុងឆ្ពោះទៅកូវ៉ែត»។

សូមជម្រាបថា អំឡុងសង្រ្គាមជាមួយរុស្ស៉ីចាប់តាំងពីឆ្នាំ២០២២មក អ៊ុយក្រែនបានអភិវឌ្ឍមធ្យោបាយមានប្រសិទ្ធភាពខ្ពស់ ដើម្បីបាញ់ស្ទាក់យន្តហោះដ្រូនអត្តឃាតផលិតដោយអ៊ីរ៉ង់ Shahed ដែលទីក្រុងមូស្គូបានប្រើប្រាស់។

បើតាមលោក ហ្សេលេនស្គី ក្រៅពីផលិតដ្រូនហោះលើអាកាស និងដ្រូនរត់ក្រោមផ្ទៃទឹក អ៊ុយក្រែនបានផ្តោតលើការផលិតដ្រូនសម្រាប់ស្ទាក់យន្តហោះដ្រូន ហើយលោកបានអះអាងថា ទីក្រុងកៀវមានសមត្ថភាពផលិតដ្រូនស្ទាក់ទាំងនោះ បានយ៉ាងហោច២០០០គ្រឿងក្នុងមួយថ្ងៃ ដែលពាក់កណ្តាលគឺសម្រាប់ការការពាររបស់ខ្លួនឯងផ្ទាល់ និងសល់ពីនោះ គឺអាចសម្រាប់ប្រើដោយសម្ព័ន្ធមិត្តរបស់អ៊ុយក្រែន៕ (AFP)