កងទ័ពជើងទឹកកម្ពុជា និងអាមេរិក ប្រកួតបាល់ទាត់មិត្តភាព

 អត្ថបទ៖ ទឹង សុភាព

ខេត្តព្រះសីហនុ៖ ក្រោយពេលចូលសំចតនៅមូលដ្ឋានសមុទ្ររាម​ក្រៅពីការធ្វើលំហាត់ហ្វឹក​ហ្វឺន​រួមគ្នាហើយនោះ នៅរសៀលថ្ងៃអាទិត្យ ទី២៥ ខែមករា ឆ្នាំ២០២៦នេះ កងទ័ពជើង​ទឹក​របស់កម្ពុជា និងអាមេរិក បានបើកការប្រកួតបាល់ទាត់ជាលក្ខណៈមិត្តភាពផងដែរ។

លោកឧត្តមនាវីត្រី​ អុិន​ សុខេមរា​ មេបញ្ជាការ​រងមូលដ្ឋាន​សមុទ្រ​រាម​កងទ័ព​ជើង​ បាន​គូស​បញ្ជាក់ថា ការប្រកួតបាល់ទាត់នេះ ជាការប្រកួតដើម្បីរឹតចំណងមិត្តភាពរវាងកងទ័ពជើង​ទឹក​កម្ពុជា និងអាមេរិក។ ក្នុងឱកាសនោះ លោក សុខេមរា បានជូនពរឱ្យ​ចំណងមិត្ត​ភាព​កម្ពុជា និងអាមេរិក កាន់តែល្អប្រសើ។

ការប្រកួតនេះ ត្រូវបានធ្វើឡើងរយៈពេល៦០នាទី ដោយ៣០នាទីសម្រាកម្តង។ បើទោះបី​ជាកងទ័ពជើងទឹក តែទាំងកងទ័ពជើងទឹកទាំងខាងកម្ពុជា និងអាមេរិក បានប្រកួតគ្នា​យ៉ាង​ស្វិត​ស្វាញ ហើយទាត់បាល់បញ្ចូលទីគ្នាទៅវិញទៅមកជាបន្តបន្ទាប់។ ជាលទ្ធផលកងទ័ព​ជើងទឹកកម្ពុជា ទាត់បញ្ចូលទីរបស់កងទ័ពជើងទឹកអាមេរិកចំនួន​៤គ្រាប់ ហើយកងទ័ពជើងទឹកអាមេរិក ទាត់បញ្ចូលទីកងទ័ពជើងទឹកកម្ពុជាចំនួន២គ្រាប់។ សូមបញ្ជាក់ថា ការប្រកួតនេះ ក្រុមកងទ័ពជើងទឹកអាមេរិក មាននាវិកជាស្ត្រីបានចូលលេងផងដែរ។

ការប្រកួតបានបញ្ចប់ទៅក្រោមបរិយាកាសរីករាយ ហើយបន្សល់នូវអនុស្សាវរីយ៍ល្អៗ​រវា​ង​គ្នាផងដែរ។ ក្រោយបញ្ចប់ការប្រកួតកីឡាករជាកងទ័ពជើងទឹកកម្ពុជា និងអាមេរិក បានចាប់ដៃលាគ្នាដោយស្នាមញញឹម ហើយបានថតរូបរួមគ្នាទុកជាអនុស្សាវរីយ៍ផងដែរ៕