តួកគីយ៉េអំពាវនាវឱ្យរុស្ស៉ីនិងអ៊ុយក្រែន កុំយកហេដ្ឋារចនាសម្ព័ន្ធថាមពល មកពាក់ព័ន្ធជាមួយសង្រ្គាម

អង់ការ៉ា៖ តួកគីយ៉េ អំពាវនាវដល់រុស្ស៉ីនិងអ៊ុយក្រែន ព្រមទាំងភាគីទាំងអស់ផ្សេងទៀត កុំឱ្យយកហេដ្ឋារចនាសម្ព័ន្ធថាមពល មកពាក់ព័ន្ធជាមួយសង្រ្គាមរបស់ពួកគេ ហើយទីក្រុងអង់ការ៉ា ចង់ឱ្យការផ្គត់ផ្គង់ថាមពលមានលំហូរដោយឥតរាំងស្ទះ ខណៈការអំពាវនាបនេះធ្វើឡើង បន្ទាប់ពី​មានករណីវាយប្រហារជាបន្តបន្ទាប់ នៅក្បែរឆ្នេរសមុទ្រខ្មៅរបស់ខ្លួន។

អ៊ុយក្រែន ដែលកំពុងកំណត់គោលដៅលើការនាំចេញប្រេងរបស់រុស្ស៉ី ស្របពេលដែលទីក្រុងមូស្គូ វាយប្រហារយ៉ាងចាស់ដៃទៅលើ​បណ្តាញថាមពលរបស់ខ្លួន បានប្រកាសចេញមុខទទួលខុសត្រូវ ចំពោះការវាយប្រហារមួយដោយប្រើដ្រូនរត់តាមផ្លូវទឹក ប្រឆាំងកប៉ាល់ដឹកប្រេង២គ្រឿង ដែលសំដៅឆ្ពោះទៅកំពង់ផែរុស្ស៉ីកាលពីសប្តាហ៍មុន។ ប៉ុន្តែទីក្រុងកៀវ បានបដិសេធការជាប់ពាក់ព័ន្ធ ក្នុងឧប្បត្តិហេតុមួយផ្សេងទៀតកាលពីថ្ងៃអង្គារសប្តាហ៍នេះ ដែលកប៉ាល់ដឹកប្រេង១គ្រឿង ដោតទង់ជាតិរុស្ស៉ី បានអះអាងថា ស្ថិតក្រោមការវាយប្រហារដោយដ្រូន។

ក្នុងការអត្ថាធិប្បាយមួយកាលពីថ្ងៃពុធ រដ្ឋមន្រ្តីក្រសួងថាមពលរបស់តួកគីយ៉េ លោក Alparslan Bayraktar បានលើកឡើងថា «សង្ឃឹមថា សង្រ្គាមដ៏អាក្រក់នេះនឹងចប់ ប៉ុន្តែនៅពេលនេះ យើងអំពាវនាវដល់ភាគីទាំងអស់ រួមទាំងរុស្ស៉ីនិងអ៊ុយក្រែន ចូរនាំគ្នាទុក​ហេដ្ឋារចនាសម្ព័ន្ធថាមពល នៅឱ្យឆ្ងាយពីសង្រ្គាមនេះ។ យើងត្រូវការរក្សាលំហូរថាមពលដោយមិនមានការរាំងស្ទះ។» ដោយលោក Bayraktar បានបន្ថែមថា ច្រកផ្គត់ផ្គង់ថាមពលដូចជា បណ្តាញបំពង់បង្ហូរប្រេង Caspian Pipeline Consortium ជាដើម គួរតែត្រូវបានរក្សា​ឱ្យមានសុវត្ថិភាព។

ទីក្រុងអង់ការ៉ា ដែលជាសមាជិក NATO បានរក្សាទំនាក់ទំនងល្អទាំងជាមួយទីក្រុងកៀវ និងជាមួយទីក្រុងមូស្គូ ប៉ុន្តែ​បាននិយាយថា ការវាយប្រហារលើកប៉ាល់ជាប់ពាក់ព័ន្ធជាមួយរុស្ស៉ី នៅក្បែរឆ្នេរតួកគីយ៉េ គឺជារឿងមិនអាចទទួលយកបានឡើយ ហើយបានព្រមានទៅភាគីទាំងពីរ និងបានលើកឡើងអំពីបញ្ហានេះ អំឡុងកិច្ចប្រជុំ NATO កាលពីថ្ងៃពុធ។ ពាក់ព័ន្ធការវាយប្រហារ​របស់ទីក្រុងកៀវ ប្រធានាធិបតីរុស្ស៉ី លោក វ៉្លាឌីមៀ ពូទីន បានគំរាមកាត់ផ្តាច់ច្រកផ្លូវសមុទ្ររបស់អ៊ុយក្រែន ហើយបានព្រមានថា រុស្ស៉ីនឹងបង្កើនការវាយប្រហារកាន់តែខ្លាំង លើទីតាំងថាមពលនិងកប៉ាល់របស់អ៊ុយក្រែន។

សូមជម្រាបថា ការវាយប្រហាររបស់រុស្ស៉ីនិងអ៊ុយក្រែន បានធ្វើឱ្យថ្លៃធានារ៉ាប់រ៉ងនៃការដឹកជញ្ជូនតាមកប៉ាល់ នៅតំបន់សមុទ្រខ្មៅ កើនឡើងខ្ពស់ ហើយជំរុញឱ្យក្រុមហ៊ុនតួកគីយ៉េមួយចំនួន ផ្អាកធ្វើប្រតិបត្តិការដែលពាក់ព័ន្ធជាមួយរុស្ស៉ី ដោយសារតែក្តីបារម្ភអំពីសន្តិសុខ៕ (Reuters)