អ៊ីស្រាអែលបើកការវាយប្រហារលើតំបន់ហ្កាហ្សា ខណៈបទឈប់បាញ់កាន់តែស្រពិចស្រពិល

ហ្ស៊េរុយសាឡិម៖ យោធាអ៊ីស្រាអែលបានប្រកាសថា នៅថ្ងៃអាទិត្យខ្លួនបានបើកការវាយប្រហារតាមផ្លូវអាកាស និងកាំភ្លើងធំទៅលើគោលដៅនានានៅភាគខាងត្បូងតំបន់ហ្កាហ្សាដែលធ្វើឱ្យក្តីសង្ឃឹមចំពោះបទឈប់បាញ់ដែលសម្របសម្រួលដោយសហរដ្ឋអាមេរិកកាន់តែស្រពិចស្រពិល ខណៈអ៊ីស្រាអែល និងក្រុមហាម៉ាសបានទម្លាក់កំហុសគ្នាទៅវិញទៅមក។

យោធាអ៊ីស្រាអែលបានបញ្ជាក់ថា ការវាយប្រហារនេះគឺសំដៅលើក្រុមសកម្មប្រយុទ្ធនៅតំបន់ រ៉ាហ្វា (Rafah) ដែលបានបាញ់ប្រហារមកលើទាហានរបស់ខ្លួន។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានព្រមានថា អ៊ីស្រាអែលនឹងសងសឹកយ៉ាងខ្លាំងក្លាចំពោះការវាយប្រហាររបស់ក្រុមហាម៉ាស។

ជាការឆ្លើយតប ស្លាបប្រដាប់អាវុធរបស់ក្រុមហាម៉ាស បានចេញសេចក្តីថ្លែងការណ៍ថា ខ្លួននៅតែប្តេជ្ញាចិត្តចំពោះកិច្ចព្រមព្រៀងឈប់បាញ់ ហើយបានអះអាងថា ខ្លួនមិនបានដឹងអំពីការប៉ះទង្គិចណាមួយនៅតំបន់ រ៉ាហ្វា នោះទេ។

សូមជម្រាបថា ការវាយប្រហារនៅថ្ងៃអាទិត្យនេះ គឺជាការសាកល្បងដ៏ធ្ងន់ធ្ងរបំផុតចំពោះបទឈប់បាញ់ដែលទើបតែចូលជាធរមានកាលពីថ្ងៃទី១១ ខែតុលា។ សាក្សីប៉ាឡេស្ទីនក៏បានរាយការណ៍អំពីការផ្ទុះ និងការបាញ់ប្រហារនៅទីតាំងជាច្រើនទៀតផងដែរ ដែលក្នុងនោះរួមមានការវាយប្រហារមួយនៅទីប្រជុំជន Deir Al-Balah ដែលបានសម្លាប់មនុស្សយ៉ាងហោចណាស់៥នាក់៕ (ប្រភព៖ Reuters)