EU នឹងកំណត់គោលដៅលើសេវាកម្មអនឡាញ របស់អាមេរិក ឆ្លើយតបវិធានការពន្ធថ្មីរបស់ ត្រាំ

 ប្រភព៖ AFP

ប៉ារីស៖ អ្នកនាំពាក្យរដ្ឋាភិបាលបារាំង បាននិយាយនៅថ្ងៃព្រហស្បតិ៍ ទី៣ ខែមេសានេះថា សហភាពអឺរ៉ុប (EU) ត្រៀមរួចរាល់ហើយសម្រាប់សង្រ្គាមពាណិជ្ជកម្ម ជាមួយសហរដ្ឋអាមេរិក ហើយគ្រោងចាត់ការលើសេវាកម្មអនឡាញ ដើម្បីជាការឆ្លើយតបទៅនឹងពន្ធគយថ្មី។

កាល​ពី​ថ្ងៃ​ពុធសប្តាហ៍នេះ ​ប្រធានាធិបតី​អាមេរិក លោក ដូណាល់ ត្រាំ បាន​ប្រកាសយក​ពន្ធ​លើ​ដៃគូ​ពាណិជ្ជកម្ម​ធំៗ​ ដែលរួម​មានទាំងចិន និង​ EU ផងដែរ។

លោកស្រី Sophie Primas បានបញ្ជាក់ដោយបង្ហាញក្តីបារម្ភជាពិសេស អំពីផលប៉ះពាល់ខ្លាំងលើស្រាក្រហម និងស្រា Voka ថា «យើងប្រាកដណាស់ថា នឹងឃើញផលប៉ះពាល់អវិជ្ជមាន ទៅលើផលិតកម្ម។ យើង​នឹង​ពិនិត្យ​មើល​របៀប​ ដែលអាច​ជួយ​ដល់​ឧស្សាហកម្ម​ផលិតកម្ម​របស់​យើង»។ លោកស្រីបន្ថែមថា «លោក ត្រាំ គិតថាគាត់គឺជាម្ចាស់នៃពិភពលោក។ ប៉ុន្តែតាមពិតទៅ វាជាគោលជំហរបែបចក្រពត្តិនិយម ដែលយើងធ្លាប់បានបំភ្លេចចោលខ្លះៗទៅហើយ»។

បើតាមលោកស្រី Primas EU កំពុងរៀបចំការឆ្លើយតប ដោយចែកចេញជាពីរដំណាក់កាល ជាមួយនិងការឆ្លើយតបដំបូង នៅពាក់កណ្តាលខែមេសា ជុំវិញផលិតផលអាលុយមីញ៉ូម និងដែកថែប។ បន្ទាប់មក EU នឹងកំណត់គោលដៅលើផលិតផល និងសេវាកម្មទាំងអស់ ដោយវិធានការជាក់ស្តែងប្រហែលជារួចរាល់នាចុងខែមេសា។ ប៉ុន្តែយើងក៏នឹងចាត់ការលើ សេវាកម្មអនឡាញមួយចំនួន ឧទាហរណ៍ ទំនិញអនឡាញរបស់អាមេរិក ដែលសព្វថ្ងៃមិនតម្រូវឱ្យបង់ពន្ធ៕