ADB ដាក់ចេញថវិកាជិត ៤០ពាន់លានដុល្លារ សម្រាប់ការអភិវឌ្ឍនៅអាស៊ី និងប៉ាស៊ីហ្វិក ក្នុងឆ្នាំ២០២៤

ភ្នំពេញ៖ ធនាគារអភិវឌ្ឍន៍អាស៊ី (ADB) បានផ្តល់ថវិកាចំនួន ២៤.៣ ពាន់លានដុល្លារក្នុងឆ្នាំ២០២៤ រួមជាមួយនឹងទឹកប្រាក់ចំនួន ១៤.៩ ពាន់លានដុល្លារក្នុងសហហិរញ្ញប្បទានដោយសហការជាមួយដៃគូដើម្បីជួយតំបន់អាស៊ី និងប៉ាស៊ីហ្វិកដោះស្រាយបញ្ហាប្រឈមនៃការអភិវឌ្ឍន៍។

លទ្ធផលហិរញ្ញវត្ថុ និងប្រតិបត្តិការរបស់ ADB ត្រូវបានចេញផ្សាយនៅថ្ងៃនេះក្នុងរបាយការណ៍ប្រចាំឆ្នាំ២០២៤ របស់ខ្លួន។ របាយការណ៍នេះសង្ខេបពីរបៀបដែល ADB គាំទ្រប្រទេសសមាជិកកំពុងអភិវឌ្ឍន៍ដើម្បីធ្វើឱ្យមានវឌ្ឍនភាពឆ្ពោះទៅរកការអភិវឌ្ឍន៍ប្រកបដោយចីរភាព បរិយាបន្ន និងធន់។

លោក Masato Kanda ប្រធាន ADB បានមានប្រសាសន៍ថា “ជាមួយនឹងការកើនឡើងនូវហិរញ្ញវត្ថុរបស់យើង និងការផ្តោតជាយុទ្ធសាស្រ្តកាន់តែច្បាស់ ADB កំពុងប្រែក្លាយការប្តេជ្ញាចិត្តទៅជាលទ្ធផលជាក់ស្តែង” ។ “យើងកំពុងផ្តល់ហិរញ្ញប្បទានដល់ប្រព័ន្ធថាមពល និងការដឹកជញ្ជូនដែលមានតម្លៃសមរម្យ និងមានប្រសិទ្ធភាពជាងមុន គាំទ្រដល់វិស័យឯកជន ដែលបង្កើតការងារប្រកបដោយគុណភាព និងពង្រឹងសេវាកម្មមូលដ្ឋានក្នុងវិស័យអប់រំ សុខភាព និងការគាំពារសង្គម។ រួមជាមួយដៃគូរបស់យើង យើងកំពុងកសាងអនាគតដ៏ភ្លឺស្វាងសម្រាប់មនុស្សជំនាន់ក្រោយនៅអាស៊ី និងប៉ាស៊ីហ្វិក។”

ទឹកប្រាក់ចំនួន ២៤.៣ ពាន់លានដុល្លារ រួមមានប្រាក់កម្ចី ជំនួយឥតសំនង ការវិនិយោគ ការធានា និងជំនួយបច្ចេកទេសដែលផ្តល់ដល់រដ្ឋាភិបាល និងវិស័យឯកជន។

ដើម្បីបន្តបង្កើតការងារដោយផ្ទាល់ចំនួន១ លានដែលមានក្នុងឆ្នាំ២០២៤ ADB បានសន្យាផ្តល់ប្រាក់ចំនួន ៤.៨ ពាន់លានដុល្លារ តាមរយៈគម្រោង និងកម្មវិធីផ្នែកឯកជនរបស់ខ្លួន កើនឡើង ២៨.៥ ភាគរយពីឆ្នាំ២០២៣។ កិច្ចសហប្រតិបត្តិការជាមួយរដ្ឋាភិបាល ស្ថាប័នហិរញ្ញវត្ថុ និងអ្នកវិនិយោគបានគាំទ្រដល់បរិយាកាសធុរកិច្ច ទីផ្សារមូលធន និងការបង្កើនពាណិជ្ជកម្ម។

របាយការណ៍នេះបានកត់ត្រាពីការវិវត្តន៍របស់ ADB ឆ្ពោះទៅរកការក្លាយជាធនាគារអភិវឌ្ឍន៍កាន់តែធំ កាន់តែប្រសើរ និងមានប្រសិទ្ធភាពជាងមុន។ ចំណុចសំខាន់ៗរួមមានកំណែទម្រង់ការគ្រប់គ្រងដើមទុន ដែលនឹងអនុញ្ញាតឱ្យ ADB ពង្រីកប្រតិបត្តិការរបស់ខ្លួន៥០ ភាគរយក្នុងទសវត្សរ៍ក្រោយ ដែលនេះគឺជាការធ្វើបច្ចុប្បន្នភាពដ៏សំខាន់សម្រាប់យុទ្ធសាស្រ្តសាជីវកម្មរបស់ស្ថាប័ន និងការបំពេញបន្ថែមចំនួន៥ ពាន់លានដុល្លារសម្រាប់មូលនិធិអភិវឌ្ឍន៍អាស៊ី ដែលជាប្រភពហិរញ្ញប្បទានឥតសំណងដ៏ធំបំផុតរបស់ ADB សម្រាប់ប្រតិបត្តិការនៅក្នុងប្រទេសកំពុងអភិវឌ្ឍន៍ ប្រទេសក្រីក្រ និងងាយរងគ្រោះបំផុត។

ADB ក៏បានដាក់ចេញជំនួយផ្នែកហិរញ្ញវត្ថុ និងចំណេះដឹងជាច្រើនក្នុងកំឡុងឆ្នាំ ដើម្បីបង្កើតប្រព័ន្ធផលិតកម្មស្បៀងដែលមានផលិតភាព និងធន់ជាងមុន កាត់បន្ថយផលប៉ះពាល់ដែលបណ្តាលមកពីការប្រែប្រួលអាកាសធាតុ ការរិចរិលបរិស្ថាន និងការបាត់បង់ជីវចម្រុះ។

ADB បានជួយប្រទេសកំពុងអភិវឌ្ឍន៍ ក្រីក្រ និងងាយរងគ្រោះក្នុងការអនុវត្តកំណែទម្រង់សំខាន់ៗ ដើម្បីកែលម្អការគ្រប់គ្រងហិរញ្ញវត្ថុសាធារណៈ ដោះស្រាយហានិភ័យសារពើពន្ធ និងជំរុញការអភិវឌ្ឍន៍សង្គម និងសេដ្ឋកិច្ចតាមរយៈការប្រមូលធនធាន និងថវិកាក្នុងស្រុកឱ្យកាន់តែប្រសើរឡើង។

ADB គឺជាធនាគារអភិវឌ្ឍន៍ពហុភាគីឈានមុខគេដែលគាំទ្រកំណើនប្រកបដោយបរិយាបន្ន ចីរភាព និងធន់នៅទូទាំងតំបន់អាស៊ី និងប៉ាស៊ីហ្វិក។ ដោយធ្វើការជាមួយសមាជិក និងដៃគូរបស់ខ្លួន ដើម្បីដោះស្រាយបញ្ហាប្រឈមដ៏ស្មុគស្មាញរួមគ្នា ADB ប្រើប្រាស់ឧបករណ៍ហិរញ្ញវត្ថុប្រកបដោយភាពច្នៃប្រឌិត និងភាពជាដៃគូយុទ្ធសាស្ត្រ ដើម្បីផ្លាស់ប្តូរជីវិត កសាងហេដ្ឋារចនាសម្ព័ន្ធប្រកបដោយគុណភាព និងការពារភពផែនដីរបស់យើង។

គួររំលឹកផងដែរថា ADB ត្រូវបានបង្កើតឡើងក្នុងឆ្នាំ១៩៦៦ មានសមាជិកចំនួន៦៩ ដែលក្នុងនោះមាន៤៩ មកពីតំបន់៕