ត្រាំ ប្រកាសដំឡើងពន្ធលើប្រទេសទាំងឡាយ ដែលទិញប្រេងពីវ៉េណេស៊ុយអេឡា

 ប្រភព៖ AFP

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានប្រកាសពីការដំឡើងពន្ធខ្ពស់លើ ផលិតផលនាំចូលពីបណ្តាប្រទេសនានា ដែលទិញប្រេង និងឧស្ម័នរបស់វ៉េណេស៊ុយអេឡា ខណៈវិធានការនេះអាចនឹងប៉ះពាល់លើចិន និងឥណ្ឌាជាដើម ក្នុងចំណោមប្រទេសដទៃទៀត។

ការដំឡើងពន្ធថ្មីខាងលើ អាចប៉ះពាល់ដល់ចិននិងឥណ្ឌា ខណៈក្រុមអ្នកជំនាញ បាននិយាយថា វ៉េណេស៊ុយអេឡា នាំចេញប្រេងទៅកាន់ប្រទេសទាំងនោះ ហើយក៏នាំចេញទៅកាន់សហរដ្ឋអាមេរិកផ្ទាល់ និងអេស៉្បាញផងដែរ។ កាលពីកុម្ភៈ បើតាម​ក្រុមអ្នកជំនាញ វ៉េណេស៊ុយអេឡា បាននាំចេញប្រេងប្រហែល ៥០០ ០០០បារ៉ែល ក្នុងមួយថ្ងៃទៅកាន់ប្រទេសចិន និងប្រមាណ ២៤០ ០០០បារ៉ែលទៅកាន់សហរដ្ឋអាមេរិក។ លោក ត្រាំ បាននិយាយថា ពន្ធ២៥ភាគរយថ្មីនេះ នឹងបន្ថែមពីលើអត្រាពន្ធដែលមានស្រាប់។

យោងតាមបទបញ្ជាមួយរបស់លោក ត្រាំ ដែលត្រូវបានចុះហត្ថលេខាកាលពីថ្ងៃចន្ទ ការឡើងពន្ធខាងលើគឺក្នុងអត្រា២៥ភាគរយ ហើយមានគៅលដៅលើប្រទេសទាំងឡាយ ដែលទិញប្រេងនិងឧស្ម័នដោយផ្ទាល់ឬមួយដោយប្រយោល ពីប្រទេសវ៉េណេស៊ុយអេឡា។ បើលឿនបំផុត វិធានការនេះអាចនឹងចូលជាធរមានតែម្តង នៅថ្ងៃទី២ ខែមេសា ប៉ុន្តែរដ្ឋមន្រ្តីការបរទេសអាមេរិក ក្រោមការពិគ្រោះយោបល់​ជាមួយទីភ្នាក់ងាររដ្ឋាភិបាលផ្សេងទៀត មានសិទ្ធិកំណត់ថា តើវិធានការដំឡើងពន្ធថ្មីនេះ នឹងដាក់ចេញដែរឬក៏អត់៕