វិមានក្រឹមឡាំង៖ រុស្ស៉ីបើកចំហចំពោះកិច្ចចរចាជាមួយអ៊ុយក្រែន ដើម្បីបិទបញ្ចប់ជម្លោះ

 ប្រភព៖ Reuters

មូស្គូ៖ វិមានក្រឹមឡាំងបាននិយាយថារុស្ស៉ីបើកចំហចំពោះកិច្ចចរចាជាមួយអ៊ុយក្រែន ដើម្បីបិទបញ្ចប់ជម្លោះ បើទោះជា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅកាន់អំណាចក៏ដោយ ប៉ុន្តែត្រូវការព័ត៌មានលម្អិតបន្ថែម។

ការអត្ថាធិប្បាយបែបនេះរបស់វិមានក្រឹមឡាំង ធ្វើឡើងបន្ទាប់ពីរដ្ឋមន្ត្រីការបរទេសអ៊ុយក្រែន លោក Dmytro Kuleba បានធ្វើការកត់សម្គាល់កាលពីថ្ងៃពុធ សប្ដាហ៍នេះអំឡុងធ្វើទស្សនកិច្ចក្នុងប្រទេសចិន ថាទីក្រុងកៀវបាន និងកំពុងត្រៀមលក្ខណៈសម្រាប់កិច្ចពិភាក្សាជាមួយរុស្ស៉ី អំពីការគោរពយ៉ាងពេញលេញនូវ អធិបតេយ្យ និងបូរណភាពទឹកដីអ៊ុយក្រែន បើទោះជាលោកផ្ទាល់និយាយថាអ៊ុយក្រែនមិនបានឃើញសញ្ញាវិជ្ជមានពីរុស្ស៉ីក៏ដោយ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា រុស្ស៉ី ជាធម្មតាតែងតែបើកចំហចំពោះដំណើរការនៃកិច្ចចរចា។ ប៉ុន្តែជាដំបូង យើងត្រូវតែស្វែងយល់ជាមុនសិនថាតើខាងភាគីអ៊ុយក្រែនបានត្រៀមខ្លួនយ៉ាងដូចម្ដេច និងថាតើភាគីអ៊ុយក្រែនបានទទួលការអនុញ្ញាតកម្រិតណាពីចៅហ្វាយរបស់ពួកគេ៕