ប្រធានពាណិជ្ជកម្មរដ្ឋ Oregon ស្វែងយល់ពីឱកាសធ្វើពាណិជ្ជកម្ម វិនិយោគ និងការតភ្ជាប់អាជីវកម្មរវាងកម្ពុជា-អាមេរិក

សហរដ្ឋអាមេរិក៖ លោកស្រី Sophorn Cheang ប្រធានពាណិជ្ជកម្មរដ្ឋ Oregon សហរដ្ឋអាមេរិក បានបង្ហាញនូវការចាប់អារម្មណ៍ និងស្វែងយល់ពីឱកាសធ្វើពាណិជ្ជកម្ម និងការពង្រីកទីផ្សារផលិតផលកម្ពុជា-អាមេរិក ខណដែលលោកស្រីបានជួបពិភាក្សាជាមួយលោកឧកញ៉ា ស្រី ចាន់ថន ចូលជួបសម្តែងការគួរសម និងពិភក្សាការងារ ពិសេសអំពីឱកាសពាណិជ្ជកម្ម វិនិយោគ និងការតភ្ជាប់អាជីវកម្មរវាងកម្ពុជា និងរដ្ឋ Oregon កាលពីថ្ងៃទី២ ខែកញ្ញា ឆ្នាំ២០២៦ លើទឹកដីសហរដ្ឋអមេរិក។

លោកស្រី Sophorn Cheang ជាសញ្ជាតិអាមេរិកាំងដែលមានដើមកំណើតខ្មែរ និងជាស្ត្រីខ្មែរមួយរូបដែលមានសមត្ថភាព និងបទពិសោធន៍ខ្ពស់ រហូតទទួលបានការទុកចិត្តកាន់តួនាទីជាថ្នាក់ដឹកនាំស្ថាប័នសេដ្ឋកិច្ចរបស់រដ្ឋ Oregon។ សមិទ្ធផលរបស់លោកស្រី គឺជាមោទកភាពមួយសម្រាប់អ្នកមានដើមកំណើតខ្មែរ លើឆាកអន្តរជាតិ។

លោកស្រី Sophorn Cheang បានចែករំលែកអំពីសក្តានុពលសេដ្ឋកិច្ច បរិយាកាសអាជីវកម្ម និងឱកាសវិនិយោគរបស់រដ្ឋ Oregon ព្រមទាំងសារៈសំខាន់នៃការភ្ជាប់ទំនាក់ទំនងរវាងអាជីវករ អ្នកវិនិយោគ និងដៃគូអន្តរជាតិ ដើម្បីបង្កើតឱកាសពាណិជ្ជកម្មថ្មីៗ។

លោកឧកញ៉ា ស្រី ចាន់ថន ក៏បានលើកឡើងងដែរពីសក្តានុពលរបស់កម្ពុជា និងចក្ខុវិស័យក្នុងការជំរុញផលិតកម្មក្នុងស្រុក ពង្រឹងវិស័យឯកជន និងពង្រីកទីផ្សារសម្រាប់ផលិតផលកម្ពុជា ជាពិសេសទីផ្សារសហរដ្ឋអាមេរិក។ លោកឧកញ៉ាបានបញ្ជាក់ថា កម្ពុជា បាននិងកំពុងជំរុញការអភិវឌ្ឍវិស័យសហគ្រាសធុនតូច និងមធ្យម (SME) ដែលជាកម្លាំងសំខាន់នៃសេដ្ឋកិច្ចជាតិ ដោយផ្តោតលើការពង្រឹងសមត្ថភាពអាជីវកម្ម លើកកម្ពស់គុណភាព និងភាពចម្រុះនៃផលិតផល ដើម្បីឱ្យអាជីវកម្មកម្ពុជាអាចពង្រីកវិសាលភាព និងឈានទៅប្រកួតប្រជែងនៅទីផ្សារអន្តរជាតិបានកាន់តែប្រសើរ។

ក្នុងន័យនេះ ការស្វែងរកទីផ្សារថ្មីៗ និងការនាំយកផលិតផលដែលផលិតនៅកម្ពុជា ទៅកាន់សហរដ្ឋអាមេរិក មិនត្រឹមតែជាការពង្រីកទីផ្សារសម្រាប់វិស័យឯកជនប៉ុណ្ណោះទេ ប៉ុន្តែថែមទាំងជួយជំរុញផលិតកម្មក្នុងស្រុក បង្កើតការងារ បង្កើនប្រាក់ចំណូល និងពង្រឹងខ្សែសង្វាក់តម្លៃក្នុងស្រុក ដែលជាមូលដ្ឋានសម្រាប់កំណើនសេដ្ឋកិច្ចប្រកបដោយចីរភាព។

លោកឧកញ៉ាក៏បានបង្ហាញពីបំណងស្វែងរកកិច្ចសហប្រតិបត្តិការជាមួយដៃគូអាជីវកម្មនៅរដ្ឋ Oregon ដើម្បីបង្កើតបណ្តាញពាណិជ្ជកម្ម និងបើកច្រកថ្មីសម្រាប់ផលិតផលកម្ពុជា ចូលទៅកាន់ទីផ្សារសហរដ្ឋអាមេរិក។

លោកស្រី Sophorn Cheang ក៏បានសម្តែងការកោតសរសើរចំពោះទស្សនវិស័យរបស់លោកឧកញ៉ា ក្នុងការពង្រីកទីផ្សារសម្រាប់ផលិតផលកម្ពុជា និងការភ្ជាប់វិស័យឯកជនកម្ពុជាជាមួយដៃគូអាជីវកម្មអន្តរជាតិ។

សូមជម្របថា ក្នុងជំនួបាងលើនេះ ភាគីទាំងពីរបានបង្ហាញពីសក្តានុពលក្នុងការពង្រឹងកិច្ចសហប្រតិបត្តិការកម្ពុជា–Oregon ក្នុងវិស័យពាណិជ្ជកម្ម វិនិយោគ ការនាំចេញ និងការតភ្ជាប់ទីផ្សារ ព្រមទាំងជាការបើកឱកាសថ្មីសម្រាប់ ផលិតផលខ្មែរ ឱ្យឈានទៅកាន់ទីផ្សារអន្តរជាតិ៕