វិមានក្រឹមឡាំង៖ កិច្ចព្រមព្រៀងសន្តិភាពអ៊ុយក្រែន នឹងកាន់តែពិបាកសម្រេច បើ ត្រាំ ចុះហត្ថលេខាលើទណ្ឌកម្មថ្មី

មូស្គូ៖ វិមានក្រឹមឡាំង បាននិយាយកាលពីថ្ងៃព្រហស្បតិ៍ ទី១៧ ខែកញ្ញា ឆ្នាំ២០២៦ថា ការដាក់ទណ្ឌកម្មបន្ថែមរបស់សហរដ្ឋអាមេរិក មកលើប្រទេសរុស្ស៊ី នឹងធ្វើឱ្យកាន់តែពិបាកក្នុងការឈានដល់កិច្ចព្រមព្រៀងសន្តិភាពនៅអ៊ុយក្រែន។

កាលពីថ្ងៃពុធសប្តាហ៍នេះ សភាតំណាងរាស្ត្រអាមេរិក បានអនុម័តកញ្ចប់វិធានការដាក់ទណ្ឌកម្មបន្ថែមយ៉ាងទូលំទូលាយមួយ ដែលមានគោលបំណង បង្កើនសម្ពាធសេដ្ឋកិច្ចលើរុស្ស៊ីជុំវិញសង្គ្រាមនៅអ៊ុយក្រែន ហើយបានបញ្ជូនសេចក្តីព្រាងច្បាប់ដាក់ទណ្ឌកម្មនេះ ទៅកាន់ប្រធានាធិបតី លោក ដូណាល់ ត្រាំ ដើម្បីចុះហត្ថលេខាចូលជាធរមាន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា «ជាការពិត យើងកំពុងតាមដានដំណើរការនៃឯកសារនេះ។ វាស្ថិតក្នុងប្រភេទសកម្មភាព ដែលប្រកាន់ជំហរអមិត្ត ហើយប្រាកដណាស់ ការដាក់ទណ្ឌកម្មបន្ថែមណាមួយពីសហរដ្ឋអាមេរិក នឹងធ្វើឱ្យកាន់តែស្មុគស្មាញដល់ កិច្ចខិតខំប្រឹងប្រែងស្វែងរកដំណោះស្រាយសន្តិភាពនៅអ៊ុយក្រែន»។

កិច្ចខិតខំប្រឹងប្រែង ដែលសហរដ្ឋអាមេរិកជាអ្នកសម្របសម្រួល ដើម្បីបញ្ចប់សង្គ្រាមនៅអ៊ុយក្រែន ដែលបានអូសបន្លាយរយៈពេល ៤ឆ្នាំកន្លះមកហើយ បានជាប់គាំងអស់រយៈពេលជាច្រើនខែ។ ប៉ុន្តែលោកប្រធានាធិបតី ត្រាំ ទើបតែបានបញ្ជូនបេសកជនពីររូប ទៅកាន់ទីក្រុងមូស្គូនិងទីក្រុងកៀវ កាលពីពេលថ្មីៗក្នុងខែនេះ ក្រោមកិច្ចខិតខំប្រឹងប្រែងជំរុញកិច្ចចរចាឱ្យដំណើរការឡើងវិញ។

សេចក្តីព្រាងច្បាប់ទណ្ឌកម្មរបស់អាមេរិក ផ្តោតលើវិស័យថាមពល និងវិស័យការពារជាតិរបស់រុស្ស៊ី ព្រមទាំងក្រុមកប៉ាល់ស្រមោល ដែលជាក្រុមនាវាដឹកប្រេងព្យាយាមគេចវេះពីទណ្ឌកម្ម ក្នុងគោលដៅកាត់បន្ថយចំណូលរបស់ទីក្រុងមូស្គូ ដែលអាចប្រើសម្រាប់ទ្រទ្រង់ដល់សង្គ្រាមនៅអ៊ុយក្រែន។

សេចក្តីព្រាងច្បាប់ខាងលើ ក៏ផ្តល់សិទ្ធិឱ្យលោក ត្រាំ ដាក់ពន្ធគយរហូតដល់ ១០០ភាគរយ លើចិន ឥណ្ឌា និងប្រទេសផ្សេងទៀត ដើម្បីកាត់បន្ថយការពឹងផ្អែករបស់ពួកគេ លើប្រេងនិងឧស្ម័នរបស់រុស្ស៊ី ផងដែរ។ ឥណ្ឌាបានព្រមានទីក្រុងវ៉ាស៊ីនតោនថា វិធានការថ្មីៗក្នុងការដាក់ពន្ធគយ ដោយសារការទិញប្រេងរុស្ស៊ី អាចប៉ះពាល់ដល់ទំនាក់ទំនងទ្វេភាគី៕ ប្រភព៖ Reuters