សហភាពសហគ្រិនអភិវឌ្ឍន៍សង្គម សម្រេចប្រើជីសរីរាង្គបូកាឈីរ៉ា ក្រោយសាកល្បង ២ ខែ

ខេត្តកំពង់ឆ្នាំង៖ បន្ទាប់ពីសាកល្បងប្រើប្រាស់ជីសរីរាង្គ បូកាឈីរ៉ា រយៈពេល២ខែ ទទួលបានលទ្ធផលល្អលើទិន្នផលកសិកម្ម សហភាពសហគមន៍កសិកម្មសហគ្រិនអភិវឌ្ឍន៍សង្គម (ស.ស.ស.អ.ស) បានសម្រេចប្រើប្រាស់ជីនេះ និងពង្រីកការផ្គត់ផ្គង់ទៅដល់កសិករ និងសមាជិករបស់ខ្លួន។

ការសម្រេចនេះត្រូវបានធ្វើឡើងតាមរយៈការចុះហត្ថលេខាលើ អនុស្សរណៈនៃការយោគយល់គ្នា (MOU) ស្តីពីការទិញជីសរីរាង្គបូកាឈីរ៉ា ដើម្បីប្រើប្រាស់នៅកសិដ្ឋានរបស់សហភាព ព្រមទាំងផ្គត់ផ្គង់ជូនកសិករទូទៅ និងលក់បន្តជូនសមាជិករបស់ខ្លួន។

បន្ទាប់ពីពិធីចុះហត្ថលេខា ក៏មានការរៀបចំវគ្គបណ្តុះបណ្តាលខ្លី ស្តីពី «មុខរបរកសិកម្មប្រកបដោយប្រាក់ចំណេញខ្ពស់ និងរស់រានបានយូរ» ដើម្បីចែករំលែកចំណេះដឹង និងបទពិសោធន៍ពាក់ព័ន្ធនឹងការធ្វើកសិកម្មប្រកបដោយប្រសិទ្ធភាព និងចីរភាព។

វគ្គបណ្តុះបណ្តាលនេះមានការធ្វើបទបង្ហាញដោយ មហាឧបាសក អៀង សុធារ៉ា សហស្ថាបនិកសហគ្រាសបូកាឈីរ៉ាជីសរីរាង្គ និងជាប្រធានសមាគមពាណិជ្ជកម្ម និងវិនិយោគកម្ពុជា-ជប៉ុន។

ជីសរីរាង្គ បូកាឈីរ៉ា ត្រូវបានណែនាំថា ជាជីសរីរាង្គដែលផ្អែកលើបច្ចេកទេស និងបទពិសោធន៍ពីប្រទេសជប៉ុន ដោយផ្តោតលើការកែលម្អគុណភាព និងជីជាតិដី ព្រមទាំងបង្កើតបរិស្ថានដីសមស្របសម្រាប់ការលូតលាស់របស់ដំណាំ។

លោក អៀង សុធារ៉ា មានប្រសាសន៍ថា “ការប្រើប្រាស់ជីដែលមានគុណភាព និងសមស្របទៅនឹងប្រភេទដី មិនត្រឹមតែជួយដល់ការដាំដុះប៉ុណ្ណោះទេ ប៉ុន្តែក៏ជាកត្តាសំខាន់ក្នុងការគ្រប់គ្រងថ្លៃដើម និងបង្កើនប្រសិទ្ធភាពផលិតកម្មកសិកម្មផងដែរ”។

លោកបានបញ្ជាក់ថា បេសកកម្មរបស់សហគ្រាសបូកាឈីរ៉ាជីសរីរាង្គ គឺចង់ចូលរួមចំណែកជំរុញការអនុវត្តកសិកម្មសរីរាង្គនៅកម្ពុជា តាមរយៈការផលិតជីសរីរាង្គជាច្រើនប្រភេទ ដែលផ្តោតលើគុណភាព ប្រសិទ្ធភាព និងភាពងាយស្រួលក្នុងការប្រើប្រាស់។

ក្រៅពីការផលិត និងផ្គត់ផ្គង់ជីសរីរាង្គ សហគ្រាសក៏មានបំណងចូលរួមស្វែងរកទីផ្សារ និងអតិថិជនសម្រាប់កសិផលសរីរាង្គរបស់កម្ពុជា ដើម្បីជួយបង្កើតខ្សែសង្វាក់តម្លៃដែលអាចផ្តល់ផលប្រយោជន៍កាន់តែច្រើនដល់កសិករ។

លោក អៀង សុធារ៉ា សង្កត់ធ្ងន់ថា ចក្ខុវិស័យរបស់សហគ្រាស គឺចង់ឃើញការអនុវត្តកសិកម្មសរីរាង្គនៅកម្ពុជាមានភាពទូលំទូលាយជាងមុន ដោយកសិករទទួលបានប្រាក់ចំណូល និងប្រាក់ចំណេញកាន់តែប្រសើរ ព្រមទាំងចូលរួមថែរក្សាបរិស្ថាន និងសុខភាពរបស់ប្រជាពលរដ្ឋ៕