ការផ្អាកដំណើរការបំពង់បង្ហូរប្រេងរបស់អារ៉ាប៊ីសាអូឌីត គំរាមកំហែងដល់ការបាត់បង់ការផ្គត់ផ្គង់ប្រេង ៤% នៃពិភពលោក

ឡុងដ៍៖ ក្រុមអ្នកជួញដូរ និងក្រុមហ៊ុនបញ្ជាទិញប្រេងបានព្រមានថា ប្រទេសអារ៉ាប៊ីសាអូឌីតនឹងអស់ស្តុកប្រេងសម្រាប់នាំចេញក្នុងរយៈពេលតែប៉ុន្មានថ្ងៃខាងមុខប៉ុណ្ណោះ ប្រសិនបើមិនអាចបើកដំណើរការឡើងវិញនូវបំពង់បង្ហូរប្រេងដ៏សំខាន់ឆ្ពោះទៅកាន់សមុទ្រក្រហមទេនោះ ដែលការណ៍នេះនឹងនាំឱ្យបាត់បង់ការផ្គត់ផ្គង់ប្រេងរហូតដល់ ៤ភាគរយ នៅទូទាំងពិភពលោក។

ការធ្លាក់ចុះនៃការនាំចេញប្រេងរបស់អារ៉ាប៊ីសាអូឌីត នឹងធ្វើឱ្យវិបត្តិខ្វះខាតការផ្គត់ផ្គង់ប្រេងសកលលោកកាន់តែធ្ងន់ធ្ងរថែមទៀត ខណៈដែលតម្លៃប្រេងឥន្ធនៈបានហក់ឡើងដល់កម្រិតខ្ពស់បំផុតជាកំណត់ត្រា រួចទៅហើយ។ ការវាយប្រហារដោយយន្តហោះដ្រូនបានបង្ខំឱ្យអារ៉ាប៊ីសាអូឌីត ត្រូវបិទបំពង់បង្ហូរប្រេងពីទិសខាងកើតទៅទិសខាងលិច កាលពីថ្ងៃសុក្រ ទី១១ ខែកញ្ញា។ ប្រភពដែលបានប្រាប់ទីភ្នាក់ងារសារព័ត៌មាន Reuters បានឱ្យដឹងថា ការជួសជុលការខូចខាតអាចនឹងចំណាយពេលចន្លោះពី ៥ ទៅ ៦សប្តាហ៍ ទោះបីជាមានការរំពឹងទុកខ្លះថា អាចនឹងបើកដំណើរការបូមប្រេងឡើងវិញជាផ្នែកៗក្នុងពេលឆាប់ៗក៏ដោយ។

ក្នុងរយៈពេល ៦ខែកន្លងមកនេះ បំពង់បង្ហូរប្រេងកាត់វាលខ្សាច់មួយនេះ បានជួយឱ្យអារ៉ាប៊ីសាអូឌីតអាចបញ្ចៀសផលប៉ះពាល់ធ្ងន់ធ្ងរពីការបិទច្រកសមុទ្រ Hormuz ដោយអាចបង្វែរទិសដៅប្រេងប្រមាណ ៤លានបារ៉ែលក្នុងមួយថ្ងៃ ទៅកាន់កំពង់ផែ Yanbu នៅឯសមុទ្រក្រហម។ ប៉ុន្តែដោយសារបំពង់បង្ហូរប្រេងត្រូវបានផ្អាកដំណើរការ កំពង់ផែ Yanbu មានស្តុកប្រេងសម្រាប់នាំចេញបន្តបានត្រឹមតែពី ៥ ទៅ ៧ថ្ងៃទៀតប៉ុណ្ណោះ។

យោងតាមទីភ្នាក់ងារថាមពលអន្តរជាតិ (IEA) ការផ្គត់ផ្គង់ប្រេងរបស់អារ៉ាប៊ីសាអូឌីត បានធ្លាក់ចុះដល់កម្រិតទាបបំផុតក្នុងរយៈពេលជាងបីទសវត្សរ៍ នៅក្នុងខែសីហា ដោយទិន្នផលប្រេងបានធ្លាក់មកនៅត្រឹម ៦.២លាន បារ៉ែលក្នុងមួយថ្ងៃ ធៀបនឹង ១០.៩លានបារ៉ែលក្នុងមួយថ្ងៃកាលពីខែកុម្ភៈ មុនពេលសង្គ្រាមផ្ទុះឡើង ខណៈដែលការផ្គត់ផ្គង់ប្រេងសកលលោកត្រូវបានព្យាករណ៍ថានឹងធ្លាក់ចុះប្រមាណ ៥.៧លានបារ៉ែលក្នុងមួយថ្ងៃ (ស្មើនឹង ៦ភាគរយ) នៅក្នុងឆ្នាំនេះ ដោយសារការបិទខ្ទប់ច្រកសមុទ្រ Hormuz និងការវាយប្រហាររបស់ក្រុមឧទ្ទាមហ៊ូទីនៅសមុទ្រក្រហម៕