សេដ្ឋកិច្ចអ៊ីរ៉ង់ ធ្លាក់ចុះ១០ភាគរយ អំឡុងសង្គ្រាមជាមួយអាមេរិក

តេហេរ៉ង់៖ សេដ្ឋកិច្ចប្រទេសអ៊ីរ៉ង់ បានធ្លាក់ដាំក្បាលចុះជាង១០ភាគរយ ក្នុងអំឡុងសង្គ្រាមនៅមជ្ឈិមបូព៌ា ដែលបានផ្ទុះឡើង ដោយសារតែការវាយប្រហាររបស់អាមេរិក និងអ៊ីស្រាអែល កាលពីចុងខែកុម្ភៈ។

យោងតាមមជ្ឈមណ្ឌលស្ថិតិអ៊ីរ៉ង់ ចេញផ្សាយកាលពីថ្ងៃអាទិត្យ ផលិតផលក្នុងស្រុកសរុប ឬ GDP របស់ប្រទេសមួយនេះ បានរួមថយប្រមាណ ១០,១ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥ ក្នុងអំឡុងពេលចាប់ពីខែមីនា ដល់ខែមិថុនា ដែលជាត្រីមាសទី១ តាមប្រតិទិនពែក្សរបស់អ៊ីរ៉ង់។

អ៊ីរ៉ង់បានធ្លាក់ចូលក្នុងសង្គ្រាមជាមួយសហរដ្ឋអាមេរិក ចាប់តាំងពីចុងខែកុម្ភៈ ឆ្នាំនេះ នៅពេលដែលការវាយប្រហាររបស់អាមេរិក និងអ៊ីស្រាអែល បានសម្លាប់មេដឹកនាំកំពូល និងមន្ត្រីយោធាជាន់ខ្ពស់របស់សាធារណរដ្ឋអ៊ីស្លាមមួយនេះ ក្នុងពេលចាប់ផ្តើមដំបូងនៃប្រតិបត្តិការវាយលុកទ្រង់ទ្រាយធំ។ ការវាយប្រហារនេះ បានជំរុញឱ្យទីក្រុងតេហេរ៉ង់ធ្វើការឆ្លើយតបវិញ ដោយបិទខ្ទប់ច្រកសមុទ្រ Hormuz ជាហេតុរុញឱ្យតម្លៃប្រេងនៅទូទាំងពិភពលោកហក់ឡើង ខណៈជម្លោះបានរីករាលដាល នៅពាសពេញតំបន់មជ្ឈិមបូព៌ាទាំងមូល។

ក្រៅពីនេះ សេដ្ឋកិច្ចរបស់ប្រទេសអ៊ីរ៉ង់ តាមពិតទៅបានជួបការលំបាក អស់រយៈពេលជាយូរមកហើយ ដោយប្រឈមជាមួយអតិផរណាខ្ពស់ខ្លាំង និងការធ្លាក់ថ្លៃរូបិយប័ណ្ណជាតិដល់កម្រិតដ៏ទាប ដែលភាគច្រើនគឺបណ្តាលមកពីទណ្ឌកម្មសេដ្ឋកិច្ច៕ ប្រភព៖ AFP