ACU ៖ មេក្រុម Online Scams នៅឃុំព្រែកខ្សាច់មានខ្សែរយៈ​ជាមន្ត្រីអន្តោប្រវេសន៍ នៅប៉ុស្តិ៍អាកាសយានដ្ឋានអន្តរជាតិតេជោ

ភ្នំពេញ៖ អង្គភាពប្រឆាំងអំពើពុករលួយ (ACU) នៅថ្ងៃទី២៥ ខែកញ្ញា ឆ្នាំ២០២៦នេះ បានចេញសេចក្ដីប្រកាសព័ត៌មាន (ភាគទី៣) ពាក់ព័ន្ធទៅនឹងសំណុំរឿងប្រព្រឹត្ដបទល្មើស Online Scams របស់លោក រៀម រុំ មេឃុំព្រែកខ្សាច់ ស្រុកគិរីសាគរ​ ខេត្តកោះកុង​ ដែលពាក់ព័ន្ធជាមួយមន្ដ្រីនគរបាលអន្ដោប្រវេសន៍ នៅព្រលានយន្ដហោះអន្ដរជាតិតេជោម្នាក់ ដែលបើកផ្លូវឲ្យពួក Online Scams ចូលប្រព្រឹត្ដបទល្មើសនៅកម្ពុជា។

ACU បានបញ្ជាក់ថា មន្ដ្រីនគរបាលអន្ដោប្រវេសន៍ ដែលបម្រើការងារនៅព្រលានយន្ដហោះអន្ដរជាតិតេជោ ហើយគប់គិតជាមួយមេឃុំព្រែកខ្សាច់ ប្រព្រឹត្ដបទល្មើស Online Scams នោះ មានឈ្មោះ ភេ ផាត់ផេង PHE PHAT PHENG។

ACU បានប្រកាសថា អនុសេនីយ៍ទោ​ (ស័ក្តិ២) ភេ ផាត់ផេង PHE PHAT PHENG ហៅ Yong Ping ហៅ Jack ហៅ Jack YP ហៅ Yong Ping Isolated ហៅ Yong Ping Alzheimer។

ACU បានបញ្ជាក់ទៀតថា​ ភេ ផាត់ផេង បានប្រព្រឹត្តអំពើល្មើសច្បាប់ផ្ទុយពីគោលការណ៍ និងការដឹកនាំរបស់អគ្គនាយកដ្ឋាន អន្តោប្រវេសន៍ ដោយហ៊ានរៀបចំឱ្យជនបរទេសចូលកម្ពុជាដោយខុសច្បាប់ ដូចជាជនបរទេសដែលមាន ឈ្មោះក្នុងបញ្ជីខ្មៅ ជនបរទេសប្រើលិខិតឆ្លងដែនក្លែងក្លាយ ក្រុមជនបរទេសដែលមកកម្ពុជា ដែលចង់ឱ្យមាន អ្នកឈរនាំចូល - លើកផ្លាកឈ្មោះចាំទទួល - អ្នកជូនដំណើរ ជាថ្នូរនឹងប្រាក់កាស។ ពួកអនឡាញហ្គេមផ្អែក លើចន្លោះប្រហោងនៃការអនុវត្តច្បាប់នេះក៏ត្រូវបាន ភេ ផាត់ផេង រៀបចំឱ្យចូលកម្ពុជាដោយគ្មានឧបសគ្គ ក្នុង នោះមានទាំងក្រុមអនឡាញស្គមរបស់ ឆៃ យ៉ូវយៀន ផង៕