អភិបាលខេត្តកំពត៖ រាជរដ្ឋាភិបាលគិតគូរជានិច្ចចំពោះការលះបង់និងគុណូបការៈរបស់មន្ត្រីរាជការគ្រប់លំដាប់ថ្នាក់

 អត្ថបទ៖ ទ្រី ហៀន

ខេត្តកំពត៖ ដើម្បីជាសក្ដីភាព ក៏ដូចជាការលើកកម្ពស់តម្លៃមន្ត្រីរាជការ មន្ត្រីជាប់កិច្ចសន្យាឱ្យកាន់តែមានទឹកចិត្ត ដែលមានស្មារតីម្ចាស់ការក្នុងការបំពេញភារកិច្ចជូនជាតិមាតុភូមិ គ្រឿងឥស្សរិយយសមេដាយការងារត្រូវបានផ្តល់ជូនមន្ត្រីរាជការ ក្រោមការគិតគូររបស់ប្រមុខរាជរដ្ឋាភិបាល ក្នុងអាណត្តិទី៧។ នេះបញ្ជាក់ឱ្យឃើញយ៉ាងច្បាស់ពីការដឹងគុណចំពោះការលះបង់ និងគុណូបការៈរបស់មន្ត្រីរាជការ ដែលបានរួមដំណើរជាមួយរាជរដ្ឋាភិបាលក្នុងកិច្ចការអភិវឌ្ឍប្រទេសជាតិ និងបំរើប្រជាពលរដ្ឋ។

ថ្លែងទៅកាន់មន្ត្រីរាជការ និងមន្ត្រីកិច្ចសន្យាប្រមាណជាង ៨០០នាក់ ក្នុងពិធីបំពាក់មេដាយការងារជូនមន្ត្រីរាជការ និងមន្ត្រីជាប់កិច្ចសន្យា នៃរដ្ឋបាលខេត្តកំពត ក្រុង-ស្រុក នាព្រឹកថ្ងៃទី៣ ខែសីហា ឆ្នាំ២០២៦ នាសាលសន្និសីទបូកគោ សាលាខេត្តកំពត ឯកឧត្តម ម៉ៅ ធនិន អភិបាលខេត្តកំពត បានលើកឡើងថា ដោយមើលឃើញនូវគុណូបការៈ ក៏ដូចជាការលះបង់របស់មន្ត្រីរាជការ មន្ត្រីកិច្ចសន្យា លោកគ្រូ អ្នកគ្រូ និងមន្ត្រីសុខាភិបាល ដែលបានលះបង់ពេលវេលា កម្លាំងកាយ កម្លាំងចិត្ត​ក្នុងការបំពេញតួនាទីបានយ៉ាងល្អប្រសើរតាមជំនាញវិជ្ជាជីវៈរៀងៗខ្លួន ដើម្បីបំរើប្រជាពលរដ្ឋក្នុងមូលដ្ឋាន​ ក៏ដូចជារួមដំណើរក្នុងការអភិវឌ្ឍប្រទេសជាតិជាមួយរាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានរៀបចំផ្តល់ជូននូវគ្រឿងឥស្សរិយយសមេដាយការងារជូនដល់មន្ត្រីរាជការ ក៏ដូចជាមន្ត្រីជាប់កិច្ចសន្យាជាបន្តបន្ទាប់។ ឯកឧត្តមអភិបាលខេត្ត​បានបន្តថា ការគិតគូរនេះគឺជាសក្ដីភាព ក៏ដូចជាការលើកកម្ពស់តម្លៃមន្ត្រីរាជការ មន្ត្រីជាប់កិច្ចសន្យាឱ្យកាន់តែមានទឹកចិត្ត ដែលមានស្មារតីម្ចាស់ការក្នុងការបំពេញភារកិច្ចជូនជាតិមាតុភូមិ ពិសេសដឹងគុណចំពោះការលះបង់ និងគុណូបការៈរបស់មន្ត្រីរាជការដែលបានលះបង់នាពេលកន្លងមក។

ក្នុងឱកាសនោះដែរ ឯកឧត្តម ម៉ៅ ធនិន ក៏បានជំរុញឱ្យមន្ត្រីរាជការទាំងអស់ដែលទទួលបានគ្រឿងឥស្សរិយយសមេដាយការងារនាពេលនេះ បន្តខិតខំប្រឹងប្រែងបំពេញតួនាទីតាមជំនាញវិជ្ជាជីវៈរបស់ខ្លួនឱ្យបានល្អបន្ថែមទៀត ដើម្បីបំរើពុកម៉ែ​ប្រជាពលរដ្ឋឱ្យកាន់តែល្អប្រសើរ ព្រោះយើងអាចទទួលបានការលើកទឹកចិត្ត និងមេដាយបន្តបន្ទាប់ទៀត។ ឯកឧត្តមអភិបាល​ខេត្ត ក៏បានរំលឹកដែរថា ក្រោយថ្ងៃរំដោះ ៧មករា ឆ្នាំ១៩៧៩ ហេដ្ឋារចនាសម្ព័ន្ធលើគ្រប់វិស័យត្រូវបានរៀបចំឡើងវិញជាបណ្តើរៗ ហើយធនធានមនុស្ស និងមន្ត្រីជំនាញក៏មិនមានច្រើនដូចបច្ចុប្បន្ន។ ប៉ុន្តែដោយសារការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចតេជោ ហ៊ុន សែន ដែលជាស្ថាបនិកសន្តិភាព បានពង្រឹងនឹងរៀបចំឡើងវិញ​បានយ៉ាងឆាប់រហ័សនូវហេដ្ឋារចនាសម្ព័ន្ធលើគ្រប់វិស័យ ដែលបច្ចុប្បន្ននេះអ្វីៗក៏មានទាំងអស់ឱ្យតែជាតម្រូវការរបស់ពលរដ្ឋ។

យោងតាមរបាយការណ៍របស់រដ្ឋបាលខេត្តកំពត​ ពិធីបំពាក់មេដាយការងារ ជូនមន្ត្រីរាជការ និងមន្ត្រីជាប់កិច្ចសន្យានាពេលនេះ រួមមានមន្ត្រីរាជការនៃរដ្ឋបាលខេត្តកំពត រដ្ឋបាលក្រុងកំពត រដ្ឋបាលក្រុងបូកគោ រដ្ឋបាលស្រុកទឹកឈូ និងរដ្ឋបាលស្រុកកំពង់ត្រាច ក្នុងនោះមានមន្ត្រីអប់រំ និងមន្ត្រីសុខាភិបាល ដែលមានចំនួន​ ៨៥០នាក់ ស្រី​ ៤៩២នាក់ ក្នុងចំណោមមន្ត្រីរាជការដែលត្រូវទទួលបានមេដាយនៅទូទាំងខេត្តចំនួន ២ ៣០២នាក់ ក្នុងនោះស្រី ១​ ២៥២នាក់៕