ត្រាំ ចង់ជួប គីម ជុងអ៊ុន ក្នុងឆ្នាំ២០២៦នេះ

វ៉ាស៊ីនតោន៖ កាសែតអាមេរិក Wall Street Journal (WSJ) នៅថ្ងៃអង្គារ ទី១៨ ខែសីហា ឆ្នាំ២០២៦ បានរាយការណ៍ថាប្រធានាធិបតីអាមេរិក លោក ដូណាល់ ត្រាំ បានជំរុញឱ្យក្រុមមន្ត្រីជំនិតៗរបស់លោកធ្វើយ៉ាងណារៀបចំជំនួបជាមួយមេដឹកនាំកូរ៉េខាងជើង លោក គីម ជុងអ៊ុន នៅក្នុងឆ្នាំនេះ។

ដោយផ្អែកលើប្រភពពីក្រុមមន្ត្រីអាមេរិក Wall Street Journal បានឱ្យដឹងទៀតថាលោក ត្រាំ បានពិភាក្សាជាលក្ខណៈឯកជនអំពីការរៀបចំជំនួបទល់មុខជាមួយលោក គីម អំឡុងដំណើរទស្សនកិច្ចទៅកាន់តំបន់អាស៊ី ដែលអាចនឹងត្រូវធ្វើឡើងនៅខែវិច្ឆិកាខាងមុខ ដើម្បីចូលរួមក្នុងកិច្ចប្រជុំកំពូលនៃកិច្ចសហប្រតិបត្តិការអាស៊ីប៉ាស៊ីហ្វិកក្នុងទីក្រុង Shenzhen ប្រទេសចិន។

បើតាមកាសែតអាមេរិក បច្ចុប្បន្នមិនទាន់មានគម្រោងជាផ្លូវការណាមួយដើម្បីជំនួបត្រាំ-គីម នៅឡើយទេ។ ប៉ុន្តែលោក ត្រាំ ប៉ុន្មានសប្ដាហ៍ថ្មីៗនេះបានបង្ហាញពីចំណាប់អារម្មណ៍ ម្ដងហើយម្ដងទៀតចង់ជួបលោក គីម សាជាថ្មី។ មិនតែប៉ុណ្ណោះ ជាការបញ្ជូនសារវិជ្ជមាន លោក ត្រាំ ថែមទាំងបានបញ្ជាឱ្យមន្ទីរបញ្ចកោណកាត់បន្ថយការធ្វើសមយុទ្ធយោធាប្រចាំឆ្នាំជាមួយ កូរ៉េខាងត្បូងផងដែរ

មន្ត្រីសេតវិមានម្នាក់បាននិយាយថាលោក ត្រាំ និងលោក គីម អាចនឹងជួបគ្នានៅពេលវេលាស័ក្តិសមណាមួយ។ រីឯបេសកកម្មកូរ៉េខាងជើងប្រចាំអង្គការសហប្រជាជាតិមិនបាន ធ្វើអត្ថាធិប្បាយអ្វីទេ។

សូមជម្រាបថា កាលពីថ្ងៃចន្ទដើមសប្ដាហ៍នេះ លោក ត្រាំ បានអះអាងថាមេដឹកនាំកូរ៉េខាងជើង លោក គីម ជុងអ៊ុន បានឆ្លើយតបទៅនឹងការទំនាក់ទំនងពីរូបលោកដើម្បីបើកកិច្ចសន្ទនា ជាការច្រានចោលទៅនឹងសេចក្ដីរាយការណ៍ថាទីក្រុងព្យុងយ៉ាងមិនបានឆ្លើយតបទៅនឹងការទំនាក់ទំនងពីរូបលោក។ លោក ត្រាំ និងលោក គីម ធ្លាប់បានជួបគ្នាចំនួន៣លើក អំឡុងអាណត្តិទី១របស់លោក៕