បទវិភាគ៖ ការយល់ដឹងពីភាពធន់ និងកម្លាំងរស់រវើកនៃសេដ្ឋកិច្ចចិនតាមរយៈ “ការឆ្ពោះទៅរកភាពថ្មី” និង “គុណភាពល្អ”
បរទេស៖ “សូចនាករជាច្រើនប្រភេទមានការកើនឡើង” “ដំណើរការសេដ្ឋកិច្ចមានភាពនឹងនរជាទូទៅ” “បានបង្ហាញភាពធន់” ។ល។ មតិអន្តរជាតិបាននាំគ្នាវាយតម្លៃដូចការលើកឡើង ខាងលើ បន្ទាប់ពីប្រទេសចិនបានប្រកាសទិន្នន័យសេដ្ឋកិច្ចក្នុងរយៈពេល៧ខែដំបូងឆ្នាំនេះកាលពីថ្ងៃទី ១៧ ខែសីហា។
ទិន្នន័យទាំងនេះបានបង្ហាញថា ពីខែមករា ដល់ខែកក្កដា សូចនាករសេដ្ឋកិច្ចសំខាន់ៗរបស់ប្រទេសចិន ដូចជាឧស្សាហកម្មកម្មន្តសាល សេវាកម្មនិងពាណិជ្ជកម្មអន្តរជាតិជាដើម បានសម្រេចកំណើន ដំណើរការសេដ្ឋកិច្ចមានការវិវឌ្ឍរីកចម្រើនប្រកបដោយភាពនឹងនរ ដែលទទួលបានការអភិវឌ្ឍថ្មីប្រកបដោយគុណភាពខ្ពស់ជាបន្តបន្ទាប់ ។
អ្នកវិភាគបានលើកឡើងថា ប្រការនេះមិនត្រឹមតែបានបង្ហាញឱ្យឃើញនូវភាពធន់ និងភាពរស់រវើកយ៉ាងខ្លាំងក្លារបស់សេដ្ឋកិច្ចចិនតែប៉ុណ្ណោះ ប៉ុន្តែក៏បានបំពេញបន្ថែមកម្លាំងចលករដល់សេដ្ឋកិច្ចសកលដែលមានកំណើនដោយទន់ខ្សោយ ។
បើវិភាគតារាងពិន្ទុនេះអាចឃើញយ៉ាងច្បាស់ថា សេដ្ឋកិច្ចចិនបានលេចចេញលក្ខណៈពិសេសទាំងបី ពោលគឺ “ភាពនឹងនរ” “ភាពថ្មី” និង “ភាពធន់” ។ទីមួយ សេដ្ឋកិច្ចចិនមានមូលដ្ឋានយ៉ាងនឹងនរ ។ ក្នុងនាមជាអង្គភាពសេដ្ឋកិច្ចធំទីពីរនៅលើពិភពលោក ប្រទេសចិនមានប្រព័ន្ធឧស្សាហកម្មពេញលេញបំផុត និងទីផ្សារទ្រង់ទ្រាយយក្ស ដូចច្នេះ មានចន្លោះគ្រប់គ្រាន់សម្រាប់ធ្វើការកែសម្រួល ហើយនិងមានសមត្ថភាពយ៉ាងខ្លាំងសម្រាប់ទប់ទល់នឹងហានិភ័យ ។ ក្នុងរយៈពេល៧ ខែដំបូងឆ្នាំនេះ តម្លៃបន្ថែមនៃឧស្សាហកម្មធុនធំនិងមធ្យមនៅទូទាំងប្រទេសចិនបានកើនឡើង៥,៣ភាគរយ បើប្រៀបធៀបនឹងរយៈពេលដូចគ្នានាឆ្នាំមុន វិស័យផលិតគ្រឿងបរិក្ខារ និងឧស្សាហកម្មបច្ចេកទេសខ្ពស់ បានកើនឡើង៩,៧ ភាគរយនិង១៣,៨ភាគរយដោយឡែកពីគ្នា មូលដ្ឋាននៃឧស្សាហកម្មមានភាពកាន់តែរឹងមាំ ។ ទំហំសរុបនៃការលក់រាយទំនិញប្រើប្រាស់ និងសេវាកម្មក្នុងសង្គមបានកើនឡើង២,៦ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ។ ព្រមពេលជាមួយគ្នានេះ ថ្លៃទំនិញប្រើប្រាស់របស់ប្រជាជនបានកើនឡើងខ្លះបើប្រៀបធៀបនឹងរយៈពេលដូចគ្នាកាលពីឆ្នាំមុន អត្រាប្តូរប្រាក់យ៉ាន់ចិនបានកើនឡើងដោយនឹងនរ ទ្រង់ទ្រាយរូបិយប័ណ្ណបរទេសបម្រុងបានរក្សាក្នុងកម្រិតលើសពី៣,៤ទ្រីលានដុល្លាអាមេរិក ។ល។ ប្រការទាំងនេះសុទ្ធតែអាចបញ្ជាក់ថា សេដ្ឋកិច្ចចិនមានមូលដ្ឋានគ្រឹះដោយនឹងនរ និងមានទីបង្អែកយ៉ាងខ្លាំងក្លា ។
គួរបញ្ជាក់ផងដែរថា យោងតាមការអភិវឌ្ឍយ៉ាងផុលផុសរបស់ឧស្សាហកម្មងើបឡើងថ្មី ដូចជាបញ្ញាសិប្បនិម្មិត និងបៃតងកាបូនទាបជាដើម កម្លាំងចលកររបស់សេដ្ឋកិច្ចចិនបាននិងកំពុងរីកចម្រើនយ៉ាងឆាប់រហ័ស ។ ក្នុងរយៈពេល៧ខែដំបូងឆ្នាំនេះ អត្រារួមចំណែករបស់កម្លាំងចលករថ្មីចំពោះកំណើនឧស្សាហកម្ម បានឡើងដល់៥០ភាគរយ ការផលិតមនុស្សយន្តឧស្សាហកម្មបានកើនឡើង ២៨,៥ភាគរយ ការផលិតឧបករណ៍បោះពុម្ព 3D និងថ្មលីចូម បានកើនឡើង ៥២,៣ភាគរយ និង ៤០,២ភាគរយ ដោយឡែកពីគ្នាបើប្រៀបធៀបនឹងរយៈពេលដូចគ្នាកាលពីឆ្នាំមុន ចំណែកឯការលក់ដូររបស់រថយន្តថាមពលថ្មីបានលើសពី៥០ភាគរយ ហើយការវិនិយោគលើឧស្សាហកម្មបច្ចេកវិទ្យាខ្ពស់បានកើនឡើង ៥ភាគរយបើប្រៀបធៀបនឹងរយៈពេលដូចគ្នាកាលពីឆ្នាំមុន ។ល។ ទិន្នន័យមួយចំនួននេះបានបង្ហាញថា ឧស្សាហកម្មកម្មន្តសាលរបស់ចិនបានពន្លឿនធ្វើបរិវត្តកម្មទៅកាន់ខ្សែសង្វាក់ឧស្សាហកម្ម និងខ្សែសង្វាក់តម្លៃកម្រិតខ្ពស់និងមធ្យម កម្លាំងចលករថ្មីមានតួនាទីបង្អែកកាន់តែខ្លាំងឡើងៗចំពោះការអភិវឌ្ឍសេដ្ឋកិច្ច ។
ក្រៅពីនេះ “ភាពធន់”របស់សេដ្ឋកិច្ចចិនក៏ធ្វើឱ្យអ្នកផងទាំងពួងមានចំណាប់អារម្មណ៍យ៉ាងជ្រាលជ្រៅ ។ សូមយកពាណិជ្ជកម្មអន្តរជាតិជាឧទាហរណ៍ ប្រឈមមុខនឹងការសាកល្បង ដូចជាភាពមិនប្រាកដប្រជាពីខាងក្រៅបានកាន់តែច្រើនឡើង និងគាំពារនិយមមានភាពកើនឡើងជាដើម ទំហំពាណិជ្ជកម្មខាងការនាំចេញ-នាំចូលសរុបរបស់ចិនក្នុងរយៈពេល៧ខែដំបូងឆ្នាំនេះ បានកើនឡើង១៧,៣ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ដែលបានបង្ហាញឱ្យឃើញនូវភាពធន់យ៉ាងខ្លាំងក្លា ហើយក៏បានបំពេញបន្ថែមនូវស្ថិរភាពដ៏មានតម្លៃដល់សកលលោក ។
បច្ចុប្បន្ននេះ ស្ថានការណ៍អន្តរជាតិមានភាពស្មុគស្មាញនិងតឹងរ៉ឹង តម្រូវការក្នុងស្រុកមិនគ្រប់គ្រាន់នៅតែជាបញ្ហាលេចធ្លោដដែល ហើយការអភិវឌ្ឍសេដ្ឋកិច្ចក៏ប្រឈមមុខនឹងហានិភ័យ និងការសាកល្បងយ៉ាងច្រើនដែរ ។ ប៉ុន្តែបើសង្កេតមើលដំណើរការសេដ្ឋកិច្ចចិនក្នុងរយៈពេល៧ខែ ដំបូងឆ្នាំនេះអាចឃើញថា “ភាពនឹងនរ”នៃនិន្នាការជាទូទៅរបស់សេដ្ឋកិច្ចចិនមិនបានកែប្រែនោះទេ ។ ដូចការវិភាគរបស់កាសែត « The Sun» នៃប្រទេសនីហ្សេរីយ៉ា ដែលថា នៅពេលអនាគត “ឱកាសចិន២.០” នឹងក្លាយទៅជា “ឱកាសសកល២.០” ហើយនឹងចែករំលែកភាគលាភកាន់តែច្រើនជាមួយពិភពលោក ៕
Post a Comment