ត្រីជាង១០​ម៉ឺន​ក្បាល ត្រូវបានជំនាញលែងចូលអាង​ទឹក​វា​រី​អគ្គិសនី​ ដើម្បីបង្កើនពូជត្រីបន្តទៀត

អត្ថបទ៖ ដេង ម៉ាវិន

ខេត្តស្ទឹងត្រែង​៖​ ជំនាញជលផល នៃ​មន្ទីរ​កសិកម្ម ខេត្តស្ទឹងត្រែងបានលែងកូនត្រីពូជ និងមេពូជជាង១០ម៉ឺនក្បាលចូលទៅក្នុងអាងទឹកវារីអគ្គិសនីសេសានក្រោម២ ដើម្បីស្តារប្រព័ន្ធអេកូឡូស៊ីឈានទៅបង្កើនពូជត្រីឲ្យបានច្រើនទៅថ្ងៃមុខ ។ កម្មវិធីនេះបានប្រព្រឹត្តទៅនៅព្រឹកថ្ងៃទី២៤សីហានេះស្ថិតនៅភូមិ​ភ្លុក ឃុំ​ភ្លុក ក្នុងស្រុក​សេ​សាននៃខេត្តស្ទឹងត្រែង ។

លោក ទុំ នី​រ៉ូ ប្រធាន​មន្ទីរ​កសិកម្ម បានមានប្រសាសន៍ថា៖ត្រីដែលបានលែងនៅពេលនេះ មានចំនួនជាង១០ម៉ឺនក្បាល ក្នុងនោះមាន កូន​ត្រី​ពូជ​សរុប​ចំនួន១០០,០០០ក្បាល ត្រី​ឆ្ពិន៦០,០០០​ក្បាល​, ត្រី​ប្រា២០,០០០​ក្បាល និង​ត្រី​ពោ២០,០០០​ក្បាល​រីឯត្រីមេ​ពូជ​ចម្រុះមានដូច​ជា ត្រី​ឆ្ពិន ត្រី​ព្រំ ត្រី​ក្រាញ់ ត្រី​ក្រាស ត្រី​រៀល និង​ត្រី​ព្រលូង ។
ឯកឧត្តម សរ សុ​ពុ​ត្រា អភិបាល​ខេត្តស្ទឹងត្រែង បាន​មានប្រសាសន៍ដាក់ឱវាទដល់សមត្ថកិច្ច និងអាជ្ញាធរពាក់ព័ន្ធទាំងអស់ថា ៖ចំពោះករណីបទល្មើសធនធានជលផលនេះ គឺត្រូវអនុវត្តឲ្យបានម៉ឺងម៉ាត់​ ដោយគ្មានការលើកលែង ត្រូវចាត់វិធានការច្បាប់ដោយបញ្ជូនទៅកាន់តុលាការ ហើយក៏មិនលើកលែងចំពោះ​មន្ត្រីរាជការ ឬ​អាជ្ញាធរ​ណា​ដែល​នៅ​ពីក្រោយ​ខ្នងបទល្មើស​ទាំងនោះឡើយ​ ៕