សេតវិមាន៖ គ្មានការចរចាណាមួយជាមួយអ៊ីរ៉ង់នោះទេ ខណៈជម្រើសទាំងអស់នៅតែស្ថិតលើតុ

វ៉ាស៊ីនតោន៖ អ្នកនាំពាក្យសេតវិមាន លោកស្រី Karoline Leavitt បានប្រកាសនៅថ្ងៃព្រហស្បតិ៍នេះថា សហរដ្ឋអាមេរិក និងប្រទេសអ៊ីរ៉ង់ បច្ចុប្បន្នមិនមានកិច្ចចរចាណាមួយដើម្បីបញ្ចប់សង្គ្រាមនោះឡើយ ដោយសារទីក្រុងវ៉ាស៊ីនតោនកំពុងផ្តោតលើការដាក់សម្ពាធសេដ្ឋកិច្ចលើទីក្រុងតេហេរ៉ង់ ប៉ុន្តែគ្រប់ជម្រើសទាំងអស់នៅតែ «ស្ថិតលើតុ» ដដែល។

ថ្លែងនៅក្នុងបទសម្ភាសន៍ជាមួយទូរទស្សន៍ Fox News លោកស្រី Leavitt បានគូសបញ្ជាក់ដូច្នេះថា «គោលដៅលេខមួយរបស់លោកប្រធានាធិបតី ត្រាំ គឺដើម្បីធានាថា អ៊ីរ៉ង់មិនអាចទទួលបានអាវុធនុយក្លេអ៊ែរជាដាច់ខាត។ ដូច្នេះ យើងបានបើកប្រតិបត្តិការ Operation Epic Fury ដើម្បីកម្ទេចយោធារបស់ពួកគេ ហើយឥឡូវនេះ យើងមានប្រតិបត្តិការ Operation Economic Outcast ដើម្បីបំផ្លាញសេដ្ឋកិច្ចរបស់ពួកគេ»។

លោកស្រីអ្នកនាំពាក្យបានសង្កត់ធ្ងន់បន្ថែមថា «គ្មានការចរចាណាមួយកំពុងកើតឡើងនៅពេលនេះទេ ហើយស្ថានភាពនេះនឹងបន្តរហូតទាល់តែលោកប្រធានាធិបតីយល់ឃើញថា ពួកគេចូលមករកតុចរចាប្រកបដោយអត្ថន័យ។ យើងមិនទាន់ឃើញរឿងនោះកើតឡើងនៅឡើយទេ។ ជាការពិតណាស់ លោកប្រធានាធិបតីនៅតែរក្សាគ្រប់ជម្រើសទាំងអស់នៅលើតុ ហើយការបិទខ្ទប់ផ្លូវទឹកដោយកងទ័ពជើងទឹកក៏នៅតែបន្តមានប្រសិទ្ធភាពដដែល»។

ស្របពេលដែលរដ្ឋមន្ត្រីក្រសួងរតនាគារអាមេរិក លោក Scott Bessent បានព្រមានប្រទេសដទៃទៀតឱ្យកាត់ផ្តាច់ទំនាក់ទំនងហិរញ្ញវត្ថុជាមួយអ៊ីរ៉ង់ ឬប្រឈមនឹងទណ្ឌកម្ម នាយករដ្ឋមន្ត្រីកាតាបានបំពេញទស្សនកិច្ចទៅកាន់ទីក្រុងតេហេរ៉ង់ កាលពីថ្ងៃព្រហស្បតិ៍ ក្នុងកិច្ចខិតខំប្រឹងប្រែងដើម្បីស្តារកិច្ចចរចាការទូតឡើងវិញ បន្ទាប់ពីអ៊ីរ៉ង់បានចាត់ទុកការបង្កើនសម្ពាធរបស់អាមេរិកថាជា «សង្គ្រាមសេដ្ឋកិច្ចទ្រង់ទ្រាយធំ»៕