ឯកឧត្តម​ កេង​ សុម៉ារិទ្ធ អញ្ជើញដឹកនាំកិច្ចប្រជុំបច្ចេកទេស ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពីសន្តិសុខសាយប័រ

 អត្ថបទ៖ ទឹង សុភាព  

ភ្នំពេញ៖ ឯកឧត្តម​ កេង​ សុម៉ារិទ្ធ រដ្ឋលេខាធិការ​ ក្រសួងយុត្តិធម៌ នារសៀលថ្ងៃទី១៤ ខែកក្កដា ឆ្នាំ២០២៦ បានអញ្ជើញដឹកនាំកិច្ចប្រជុំបច្ចេកទេស​ ជាមួយក្រុមការងារក្រសួងប្រៃសណីយ៍ និងទូរគមនាគមន៍ ដេីម្បីពិនិត្យ​ និងពិភាក្សាលេីសេចក្តីព្រាងច្បាប់ស្តីពីសន្តិសុខសាយប័រ​នៅសាលប្រជុំនៃទីស្តីការក្រសួងយុត្តិធម៌។

កិច្ចប្រជុំនេះ ក៏មានការចូលរួមពីលោកជំទាវ​ សុន​ សុខាលីដា​ ប្រតិភូរាជរដ្ឋាភិបាល​ និងជាអគ្គនាយកនៃអគ្គនាយកដ្ឋានកិច្ចការអយ្យការ​និងព្រហ្មទណ្ឌ​ ព្រមទាំងសហការីដែលជាសមាសភាពក្រុមការងារដឹកនាំការត្រួតពិនិត្យផ្នែកទោសប្បញ្ញត្តិនៃសេចក្តីព្រាងច្បាប់ និងលិខិតបទដ្ឋានគតិយុត្តនានារបស់ក្រសួងយុត្តិធម៌​ ចំនួន​ ៤​ រូប​ ជាមួយនឹងក្រុមការងារនៃក្រសួងប្រៃសណីយ៍ និងទូរគមនាគមន៍ ដឹកនាំដោយ ឯកឧត្តម គង់ ​ ផល្លៈ រដ្ឋលេខាធិការក្រសួងប្រៃសណីយ៍ និងទូរគមនាគមន៍។

សូមជម្រាបថា កិច្ចប្រជុំនេះ ជាកិច្ចប្រជុំលេីកទីពីរ​ ដែលបានបន្តពិនិត្យ និងពិភាក្សាលេីផ្នែកទោសប្បញ្ញតិ្តនៃសេចក្តីព្រាងច្បាប់ស្តីពីសន្តិសុខសាយប័រ ដើម្បីធានាប្រសិទ្ធភាពនៃការអនុវត្ត និងធានាបាននូវសង្គតិភាពផ្នែកគតិយុត្តជាមួយបទប្បញ្ញត្តិជាធរមាន៕