អ៊ីរ៉ង់ បាញ់មីស៊ីលលើអ៊ីស្រាអែល ជាលើកដំបូងបន្ទាប់ពីមានបទឈប់បាញ់

តេហេរ៉ង៖ អ៊ីរ៉ង់ បានបាញ់មីស៊ីលទៅកាន់គោលដៅនៅអ៊ីស្រាអែល ជាការសងសឹកចំពោះការវាយប្រហាររបស់អ៊ីស្រាអែលលើទីក្រុងបេរូត​ ប្រទេសលីបង់ កាលពីថ្ងៃអាទិត្យចុងសប្តាហ៍កន្លងទៅនេះ។

ឆ្មាំបដិវត្តន៍អ៊ីរ៉ង់និយាយថា ពួកគេបានកំណត់គោលដៅលើមូលដ្ឋានទ័ពអាកាស Ramat David នៅជិតទីក្រុង Nazareth របស់អ៊ីស្រាអែល។ យោធាអ៊ីស្រាអែលនិយាយថា ប្រព័ន្ធការពារដែនអាកាសរបស់ខ្លួនបាញ់ស្ទាក់មីស៊ីលនោះ។

អ៊ីរ៉ង់​ បាននិយាយជាយូរមកហើយ ថាកិច្ចព្រមព្រៀងសន្តិភាពជាមួយសហរដ្ឋអាមេរិក គឺផ្អែកលើបទឈប់បាញ់ដែលរួមបញ្ចូលទាំងនៅលីបង់។ ប៉ុន្តែកាលពីថ្ងៃអាទិត្យ អ៊ីស្រាអែលបានបើកការវាយប្រហារជាយក្រុងបេរូត ជាលើកដំបូងចាប់តាំងពីសហរដ្ឋអាមេរិក ប្រកាសផែនការបទឈប់បាញ់សម្រាប់លីបង់ នៅសប្តាហ៍មុន។

សូមរម្លឹកថា ការប្រយុទ្ធគ្នារវាងអ៊ីស្រាអែល ជាមួយក្រុមហេសបូឡាគាំទ្រដោយអ៊ីរ៉ង់ បានផ្ទុះឡើងវិញកាលពីខែមីនា ពោលគឺបន្ទាប់ពីសហរដ្ឋអាមេរិក និងអ៊ីស្រាអែលបើកការវាយប្រហារលើអ៊ីរ៉ង់៕ (Reuters)