រដ្ឋបាលស្រុកឈូក ចុះពិនិត្យឃ្លាំងស្តុកទំនិញ ៤កន្លែង និងធ្វើកិច្ចសន្យាណែនាំអាជីវករមិនឱ្យនាំចូលទំនិញខុសច្បាប់

អត្ថបទ៖ ទ្រី ហៀន

ខេត្តកំពត៖ យោងតាមកិច្ចចង្អុលការដ៏ខ្ពង់ខ្ពស់របស់ ឯកឧត្តម ម៉ៅ ធនិនអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពត, នៅថ្ងៃទី១៥ ខែមិថុនា ឆ្នាំ២០២៦ កម្លាំងសមត្ថកិច្ចចម្រុះរដ្ឋបាលស្រុកឈូក ដឹកនាំដោយ លោក សៅ មឿន អភិបាលស្រុកឈូក បានចុះត្រួតពិនិត្យទីតាំងឃ្លាំងស្តុកទំនិញចំនួន ៤កន្លែង ស្ថិតនៅផ្សារឈូក ភូមិសត្វពង ឃុំសត្វពង ស្រុកឈូក ខេត្តកំពត។
​

ជាលទ្ធផលនៃការចុះត្រួតពិនិត្យ ក្រុមការងារបានរកឃើញ៖ ​ឃ្លាំងទាំងនោះជាកន្លែងស្តុកទំនិញប្រភេទគ្រឿងទេស ភេសជ្ជៈ និងសម្ភារប្រើប្រាស់ជាច្រើនប្រភេទ។ ​ក្នុងនោះដែរ ក៏បានរកឃើញទំនិញចំនួន ២មុខ រួមមាន៖ ស្ករស ចំនួន ២៩ប៉ាវ និងប៊ីចេង ចំនួន ៣ប៉ាវ ដែលទើបតែនាំចូលមកពីប្រទេសថៃ (ដោយគ្មានច្បាប់អនុញ្ញាតត្រឹមត្រូវ)។

​ក្រោយការពិនិត្យជាជំនាញ ក្រុមការងារចម្រុះបានធ្វើការណែនាំ និងតម្រូវឱ្យអាជីវករទាំងអស់ ​ត្រូវមានមនសិការស្នេហាជាតិ និងចូលរួមគោរពច្បាប់ និង​ធ្វើកិច្ចសន្យាបញ្ឈប់ការទិញ និងលក់ចែកចាយទំនិញទាំងនោះ នៅក្នុងភូមិសាស្ត្រស្រុកឈូកបន្តទៀត។ ​ក្នុងករណីរកឃើញមានកំហុសជាលើកទី២ រដ្ឋបាលស្រុក និងមន្ត្រីជំនាញ នឹងចាត់វិធានការដកហូត និងអនុវត្តតាមនីតិវិធីច្បាប់ជាធរមាន។

​គួរបញ្ជាក់ផងដែរថា ប្រតិបត្តិការនេះមានការចូលរួមសម្របសម្រួល និងសហការយ៉ាងសកម្មពីសំណាក់ សាខាគយនិងរដ្ឋាករខេត្ត, មន្ទីរពាណិជ្ជកម្មខេត្ត, សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្ត រួមជាមួយកងកម្លាំងមានសមត្ថកិច្ចពាក់ព័ន្ធជាច្រើនរូបទៀត៕