ត្រាំ គំរាមថាសហរដ្ឋអាមេរិកអាចនឹងបើកការវាយប្រហារជាថ្មីលើអ៊ីរ៉ង់ នៅប៉ុន្មានថ្ងៃខាងមុខ

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអង្គារ ទី១៩ ខែឧសភា ឆ្នាំ២០២៦ បាននិយាយថាសហរដ្ឋអាមេរិកប្រហែលជាអាចនឹងបើក ការវាយប្រហារសាជាថ្មីលើអ៊ីរ៉ង់ បន្ទាប់ពីបានប្រកាសផ្អាកគម្រោងវាយប្រហារមួយដែលដំបូងឡើយគ្រោងនឹងធ្វើឡើងនៅថ្ងៃអង្គារសប្ដាហ៍នេះ ដើម្បីទុកផ្លូវសម្រាប់ កិច្ចចរចា។

ការអត្ថាធិប្បាយរបស់លោក ត្រាំ ធ្វើឡើងមួយថ្ងៃប៉ុណ្ណោះបន្ទាប់ពីរូបលោកបានផ្អាកគម្រោងវាយប្រហារលើអ៊ីរ៉ង់ ក្រោយមានសេចក្ដីរាយការណ៍ថ្មីមួយថាតេហេរ៉ង់ បានបញ្ជូនសំណើសន្តិភាពទៅឱ្យទីក្រុងវ៉ាស៊ីនតោន។

ថ្លែងទៅកាន់ក្រុមអ្នកសារព័ត៌មាននៅឯសេតវិមានកាលពីថ្ងៃអង្គារ លោក ត្រាំ បានលើកឡើងថា «ខ្ញុំនៅសល់ ពេលតែមួយម៉ោងប៉ុណ្ណោះពីការសម្រេចចិត្តបើកការវាយប្រហារនៅថ្ងៃនេះ (ថ្ងៃអង្គារ)»។ តាមលោក ត្រាំ មេដឹកនាំអ៉ីរ៉ង់បានអង្វរសុំកិច្ចព្រមព្រៀងមួយ ហើយលោក បន្ថែមថាការវាយប្រហារថ្មីមួយរបស់សហរដ្ឋអាមេរិកអាចនឹងធ្វើឡើងនៅប៉ុន្មានថ្ងៃខាងមុខ ប្រសិនបើមិនមានកិច្ចព្រមព្រៀងត្រូវបានឈានដល់ទេនោះ។

លោក ដូណាល់ ត្រាំ កំពុងប្រឈមមុខនឹងសម្ពាធក្នុងស្រុកឱ្យបិទបញ្ចប់សង្រ្គាមជាមួយអ៊ីរ៉ង់ ដើម្បីឈានទៅរកការបើកច្រកសមុទ្រ Hormuz ឡើងវិញ ខណៈការឡើងថ្លៃតម្លៃប្រេងបានធ្វើឱ្យប្រជាប្រិយភាពលោកធ្លាក់ចុះទាបបំផុតមួយ ក្នុងបរិបទដែលសហរដ្ឋអាមេរិកនឹងត្រូវរៀបចំការបោះឆ្នោតមុនអាណត្តិ នៅខែវិច្ឆិកាខាងមុខនេះ។

បើតាមប្រព័ន្ធផ្សព្វផ្សាយអ៊ីរ៉ង់ សំណើសន្តិភាពថ្មីចុងក្រោយបំផុតមួយដែលតេហេរ៉ង់បានបញ្ជូនឱ្យសហរដ្ឋអាមេរិក ក្នុងនោះរួមមានការទាមទារឱ្យបិទបញ្ចប់សង្រ្គាម នៅគ្រប់សមរភូមិទាំងអស់ក្នុងនោះរួមមានទាំងនៅលីបង់ ការដកកងទ័ពអាមេរិកចេញពីតំបន់ស្ថិតនៅក្បែរអ៉ីរ៉ង់ សំណងជួសជុលការខូចខាតបង្កឡើងដោយ ការវាយប្រហាររបស់សហរដ្ឋអាមេរិក និងអ៉ីស្រាអែល។ អ៉ីរ៉ង់ក៏ទាមទារផងដែរឱ្យសហរដ្ឋអាមេរិកដកទណ្ឌកម្មសេដ្ឋកិច្ច បញ្ចេញទ្រព្យសម្បត្តិរបស់អ៉ីរ៉ង់ដែលត្រូវបាន បង្កក និងបិទបញ្ចប់ការបិទខ្ទប់ដែនសមុទ្ររបស់សហរដ្ឋអាមេរិក។

សំណើសន្តិភាពរបស់អ៊ីរ៉ង់ខាងលើហាក់មិនមានអ្វីផ្លាស់ប្ដូរធំដុំពីសំណើមុនៗនោះទេ ហើយដែលសំណើទាំងនោះត្រូវបានលោក ត្រាំ ទាត់ចោលកាលពីសប្ដាហ៍មុន ដោយហៅវាថាជាសំរាម៕ (Reuters)