WFP ព្រមានថាសង្គ្រាមនៅអ៊ីរ៉ង់ អាចរុញច្រានមនុស្ស ៤៥ លាននាក់ឱ្យធ្លាក់ក្នុងភាពអត់ឃ្លានត្រឹមខែមិថុនា

ហ្សឺណែវ៖ កម្មវិធីស្បៀងអាហារពិភពលោក (WFP) បានចេញការព្រមាននៅថ្ងៃអង្គារនេះថា មនុស្សរាប់សិបលាននាក់បន្ថែមទៀតនឹងប្រឈមមុខនឹងភាពអត់ឃ្លានយ៉ាងធ្ងន់ធ្ងរ ប្រសិនបើសង្គ្រាមនៅអ៊ីរ៉ង់នៅតែបន្តអូសបន្លាយរហូតដល់ខែមិថុនាខាងមុខ។

របាយការណ៍បានបង្ហាញថា ការវាយប្រហាររបស់សហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់ ដែលបានចាប់ផ្តើមកាលពីចុងខែកុម្ភៈ បានរារាំងផ្លូវដឹកជញ្ជូនជំនួយមនុស្សធម៌សំខាន់ៗ និងពន្យារពេលការផ្តល់ជំនួយសង្គ្រោះជីវិតដល់តំបន់ដែលមានវិបត្តិអាក្រក់បំផុតមួយចំនួនលើពិភពលោក។

លោក ខាល ស្កូវ (Carl Skau) អគ្គនាយករង WFP បានប្រាប់អ្នកយកព័ត៌មានក្នុងទីក្រុងហ្សឺណែវថា មនុស្សចំនួន ៤៥លាននាក់បន្ថែមទៀតត្រូវបានព្យាករណ៍ថានឹងធ្លាក់ចូលក្នុងភាពអត់ឃ្លាន ដោយសារការកើនឡើងនៃថ្លៃម្ហូបអាហារ ប្រេង និងការដឹកជញ្ជូន ដែលនឹងរុញច្រានតួលេខអ្នកអត់ឃ្លានសកលឱ្យហក់ឡើងលើសពីកំណត់ត្រាបច្ចុប្បន្នចំនួន ៣១៩លាននាក់។

លោកបានសង្កត់ធ្ងន់ថា «វានឹងនាំកម្រិតនៃភាពអត់ឃ្លានសកលដល់កំណត់ត្រាមួយដែលមិនធ្លាប់មាន...សូម្បីតែមុនពេលមានសង្គ្រាមនេះ យើងក៏ស្ថិតក្នុងស្ថានភាពដ៏អាក្រក់រួចទៅហើយ ដែលភាពអត់ឃ្លានមិនធ្លាប់មានសភាពធ្ងន់ធ្ងរបែបនេះទេ ទាំងចំនួន និងជម្រៅនៃភាពអត់ឃ្លាននោះ»។

ទន្ទឹមគ្នានេះ លោកបានបន្ថែមថា ថ្លៃដឹកជញ្ជូនរបស់ WFP បានកើនឡើងដល់ទៅ ១៨% ចាប់តាំងពីសង្គ្រាមផ្ទុះឡើង ដោយបង្ខំឱ្យពួកគេត្រូវប្តូរផ្លូវដឹកជញ្ជូន។ បញ្ហាប្រឈមទាំងនេះកើតឡើងស្របពេលដែល WFP ត្រូវកាត់បន្ថយការចំណាយយ៉ាងច្រើន ដោយសារប្រទេសម្ចាស់ជំនួយភាគច្រើនកំពុងងាកទៅផ្តោតការចំណាយលើវិស័យការពារជាតិវិញ៕ (Reuters)