ត្រាំ គំរាមថា NATO នឹងជួបអនាគតដ៏អាក្រក់ បើមិនជួយបើកច្រកសមុទ្រ Hormuz

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយថា បក្សសម្ព័ន្ធយោធា NATO នឹងប្រឈមមុខជាមួយ​អនាគតដ៏អាក្រក់ ប្រសិនបើក្រុមសម្ព័ន្ធមិត្តអាមេរិកមួយនេះ មិនជួយបើកច្រកសមុទ្រ Hormuz ឡើងវិញ។

ក្នុងកិច្ចសម្ភាសជាមួយកាសែត Financial Times កាលពីថ្ងៃអាទិត្យ លោក ត្រាំ បាននិយាយថា ដោយសារតែសហរដ្ឋអាមេរិក បានខិតខំជួយអ៊ុយក្រែនក្នុងសង្រ្គាមប្រឆាំងរុស្ស៉ី ដូច្នេះរូបលោករំពឹងថា អឺរ៉ុបនឹងជួយដល់កិច្ចប្រឹងប្រែងបើកច្រកសមុទ្រ Hormuz ដែលត្រូវបានបិទដោយសារសង្រ្គាមអ៊ីរ៉ង់ ហើយធ្វើឱ្យតម្លៃប្រេងហក់ឡើងនៅទូទាំងពិភពលោក។

លោកប្រធានាធិបតីអាមេរិក បាននិយាយយ៉ាងដូច្នេះថា «ប្រសិនបើគ្មានការឆ្លើយតប ឬក៏ជាការឆ្លើយអវិជ្ជមាន ខ្ញុំគិតថាវានឹងមានផលអាក្រក់ជាខ្លាំង សម្រាប់អនាគតរបស់ NATO។ វាជារឿងសក្តិសមសម្រាប់អ្នកដែលទទួលអត្ថប្រយោជន៍ពីច្រកសមុទ្រ Hormuz ត្រូវជួយធានាថា គ្មានរឿងអាក្រក់កើតឡើងនៅទីនោះ»។

គួរបញ្ជាក់ថា គិតត្រឹមថ្ងៃអាទិត្យកន្លងទៅ តម្លៃប្រេងឆៅអាមេរិក West Texas បានកើន២.៥ភាគរយ ដល់១០០.២២ដុល្លារក្នុងមួយបារ៉ែល ខណៈប្រេងឆៅអន្តជាតិ Brent បានកើនតម្លៃ២.៩ភាគរយ ដល់១០៦.១១ដុល្លារក្នុងមួយបារ៉ែល។

សូមជម្រាបថា សង្រ្គាមនៅមជ្ឈិមបូព៌ា បានផ្ទុះឡើងតាំងពីថ្ងៃទី២៨ ខែកុម្ភៈ នៅពេលសហរដ្ឋអាមេរិកនិងអ៊ីស្រាអែល បានបើកយុទ្ធនាការវាយប្រហារតាមផ្លូវអាកាសក្នុងទ្រង់ទ្រាយធំ ប្រឆាំងប្រទេសអ៊ីរ៉ង់ ដែលមកទល់ពេលនេះ សង្រ្គាមបានអូសបន្លាយ​ជាង២សប្តាហ៍ហើយ៕ (AFP)