ប្រមុខការទូត EU អំពាវនាវឱ្យអាមេរិក និងអ៊ីស្រាអែល បញ្ឈប់សង្គ្រាមនៅអ៊ីរ៉ង់ជាបន្ទាន់

ប្រ៊ុចសែល៖ នាថ្ងៃអង្គារ លោកស្រី Kaja Kallas ប្រមុខគោលនយោបាយការបរទេសនៃសហភាពអឺរ៉ុប (EU) បានអំពាវនាវឱ្យសហរដ្ឋអាមេរិក និងអ៊ីស្រាអែល បញ្ឈប់សង្គ្រាមជាមួយអ៊ីរ៉ង់ ដោយលោកស្រីបញ្ជាក់ថា EU កំពុងធ្វើការពិគ្រោះយោបល់យ៉ាងសកម្មជាមួយបណ្តាប្រទេសក្នុងតំបន់មជ្ឈិមបូព៌ា ដើម្បីស្វែងរកមធ្យោបាយបញ្ចប់ជម្លោះនេះ។

ក្នុងបទសម្ភាសន៍នៅទីក្រុងប្រ៊ុចសែល លោកស្រី Kallas បានសង្កត់ធ្ងន់ថា «វាជាផលប្រយោជន៍របស់គ្រប់គ្នា ប្រសិនបើសង្គ្រាមនេះត្រូវបញ្ឈប់» ដោយព្រមានថា ការចាប់ផ្តើមសង្គ្រាមគឺជារឿងងាយ ប៉ុន្តែការបញ្ចប់វាគឺជារឿងពិបាក ហើយជារឿយៗវាច្រើនតែហួសពីការគ្រប់គ្រង។ លោកស្រីបញ្ជាក់ថា EU មានឆន្ទៈប្រើប្រាស់ផ្លូវការទូតដើម្បីនាំយកភាគីពាក់ព័ន្ធមកចរចាគ្នា «ដើម្បីឱ្យគ្រប់គ្នាសុទ្ធតែរក្សាបានមុខមាត់» ក្នុងកិច្ចបញ្ចប់ជម្លោះនេះ។

មេដឹកនាំអឺរ៉ុបបានសម្តែងការមិនពេញចិត្ត ដែលពួកគេមិនត្រូវបានអាមេរិក និងអ៊ីស្រាអែល ពិគ្រោះយោបល់ជាមុន មុនពេលចាប់ផ្តើមសង្គ្រាមនេះ។ លោកស្រី Kallas បានរិះគន់ដោយប្រយោលថា «ការព្រួយបារម្ភចម្បងរបស់ប្រទេសអឺរ៉ុប គឺយើងមិនត្រូវបានគេពិគ្រោះយោបល់នោះទេ។ តាមពិតទៅ មានជនជាតិអឺរ៉ុបជាច្រើន បានព្យាយាមបញ្ចុះបញ្ចូលមិនឱ្យអាមេរិក និងអ៉ីស្រាអែលចាប់ផ្តើមសង្គ្រាមនេះផងដែរ»។

សូមជម្រាបថា ប្រទេសអឺរ៉ុបជាច្រើន បានបដិសេធមិនចូលរួមក្នុងបេសកកម្មបើកច្រកសមុទ្រ ហ័រមូស (Hormuz) តាមការទាមទាររបស់លោក ដូណាល់ ត្រាំ នោះទេ៕