លោក គីម ជុងអ៊ុន សន្យាគាំទ្រលោក ពូទីន ដោយគ្មានលក្ខខណ្ឌ

សេអ៊ូល៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានសន្យាផ្ដល់ការគាំទ្រដោយឥតលក្ខខណ្ឌចំពោះគោលនយោបាយ និងការសម្រេចចិត្តទាំងឡាយរបស់លោកប្រធានាធិបតីរុស្ស៉ី វ្ល៉ាឌីមៀ ពូទីន។

KCNA នៅថ្ងៃសុក្រ ទី៩ ខែមករា បានរាយការណ៍ថានៅក្នុងលិខិតមួយ លោក គីម ជុងអ៊ុនបាននិយាយថារូបលោកមានអារម្មណ៍ទទួលដឹងពីទំនាកទំនងមិត្តភាពដ៏ពិតប្រាកដចេញពីលោក ពូទីន ហើយបានចាត់ទុកថាទំនាក់ទំនងរបស់លោកជាមួយលោក ពូទីនមានតម្លៃជាទីបំផុត។ «កិច្ចសហប្រតិបត្តិការជិតស្និទ្ធរវាងប្រទេសទាំង២នឹងបន្តលើគ្រប់វិស័យទាំងអស់នៅពេលអនាគត»។ នេះជាការគូសបញ្ជាក់របស់លោក គីម។ លោក គីមបានបន្តទៀតថារូបលោកនឹងគោរព ហើយគាំទ្រដោយឥតលក្ខខណ្ឌចំពោះគោលនយោបាយ និងការសម្រេចចិត្តទាំងឡាយរបស់លោក ពូទីន។

បើតាម KCNA លោក គីម ជុងអ៊ុន និងលោក ពូទីន ក៏បានឆ្លើយឆ្លងសំបុត្រគ្នាផងដែរក្នុងការសារអបអរឆ្នាំថ្មី ដោយក្នុងនោះលោក គីម បាននិយាយថាកូរ៉េខាងជើង និងរុស្ស៉ី បានរួមឈាម រួមរស់ និងរួមស្លាប់ជាមួយគ្នានៅលើសមរភូមិសង្រ្គាមអ៊ុយក្រែន។ លោក ពូទីនវិញបានសាទរនូវអ្វីដែលលោកហៅថាជាទំនាក់ទំនងមិនអាចបំបែកបំបាក់បានរវាងកូរ៉េខាងជើង និងរុស្ស៉ី។ តាមចារកម្មកូរ៉េខាងត្បូង និងលោកខាងលិច កូរ៉េខាងជើង បានបញ្ជូនកងទ័ព និងសព្វាវុធទៅជួយជាកម្លាំងដល់កងទ័ពរុស្ស៉ី នៅក្នុងសង្រ្គាមប្រឆាំងអ៊ុយក្រែន៕ (AFP)