ត្រាំ ចង់ដឹងពីផែនការរបស់អ៊ុយក្រែនស្តីពីការប្រើប្រាស់មីស៊ីល Tomahawk ដែលទីក្រុងកៀវចង់បាន

វ៉ាស៊ីនតោន៖ ប្រធានាធិបតីអាមេរិក លោក​ ដូណាល់ ត្រាំ បាននិយាយថា លោកចង់ដឹងថា អ៊ុយក្រែននឹងយកមីស៊ីលរយៈចម្ងាយឆ្ងាយ Tomahawk ទៅប្រើប្រាស់ដោយរបៀបណាឱ្យប្រាកដ មុនពេលសម្រេចចិត្តផ្តល់ពួកវា ពីព្រោះលោកមិនចង់ឱ្យសង្រ្គាមរុស្ស៉ីនៅអ៊ុយក្រែន កាន់តែកើនឡើងថែមទៀតទេ។

លោក ត្រាំ គូសបញ្ជាក់ថា «ខ្ញុំគិត ថាខ្ញុំត្រូវតែដឹងជាមុនសិនថាពួកគេ (អ៊ុយក្រែន) នឹងធ្វើយ៉ាងមិច។ តើពួកគេបញ្ជូនទៅណា? ខ្ញុំត្រូវតែសួរឱ្យដឹងច្បាស់។ ខ្ញុំមិនបង្កើនភាពតានតឹងក្នុងសង្រ្គាមនោះទេ»។

មីស៊ីល Tomahawk អាចបាញ់បានចម្ងាយ ២ ៥០០គីឡូម៉ែត្រ ដែលអាចបាញ់ចូលជ្រៅទៅក្នុងទឹកដីរុស្ស៉ី។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានស្នើឱ្យសហរដ្ឋអាមេរិកលក់មីស៊ីលនេះ ទៅឱ្យប្រទេសអឺរ៉ុប ដែលអាចនឹងបញ្ជូនវាបន្តមកអ៊ុយក្រែន៕ (ប្រភព៖ Reuters)