ផែនការវាយលុកហ្គាហ្សាថ្មី របស់លោក Netanyahu រងសម្ពាធពីគ្រប់ទិស

ហ្សេរុយសាឡឹម៖ ផែនការថ្មីរបស់នាយករដ្ឋមន្ត្រី Benjamin Netanyahu ក្នុងការចូលគ្រប់គ្រងតំបន់ហ្គាហ្សាទាំងស្រុង កំពុងប្រឈមនឹងការប្រឆាំងយ៉ាងខ្លាំងពីគ្រប់ទិសទី ដោយដៃគូសម្ព័ន្ធស្តាំនិយមជ្រុលរបស់លោក ទាមទារឱ្យមានសកម្មភាពកាន់តែខ្លាំងក្លា ខណៈយោធា និងសម្ព័ន្ធមិត្តអន្តរជាតិបានព្រមានពីហានិភ័យនៃគ្រោះមហន្តរាយ។

រដ្ឋមន្ត្រីហិរញ្ញវត្ថុ លោក Bezalel Smotrich បានរិះគន់ផែនការនេះថា មិនគ្រប់គ្រាន់ ហើយថា វាគ្រាន់តែជាល្បិចដើម្បីទាញហាម៉ាសមកចរចាប៉ុណ្ណោះ មិនមែនដើម្បីជ័យជម្នះដាច់ខាតទេ។ លោក Itamar Ben-Gvir រដ្ឋមន្ត្រីសន្តិសុខជាតិ ក៏បានជំរុញឱ្យមានការគ្រប់គ្រងហ្គាហ្សាដោយយោធាទាំងស្រុងផងដែរ។

ជំហរដ៏តឹងរ៉ឹងនេះ ផ្ទុយស្រឡះពីការព្រមានរបស់យោធាអ៊ីស្រាអែលផ្ទាល់ ដែលបារម្ភថា ការពង្រីកប្រតិបត្តិការនឹងបង្កគ្រោះថ្នាក់ដល់ចំណាប់ខ្មាំង និងទាហាន។ នៅលើឆាកអន្តរជាតិ រដ្ឋមន្ត្រីការបរទេសអ៊ីតាលី លោក Antonio Tajani បានព្រមានថា ការឈ្លានពាននេះ អាចនឹងក្លាយជា «សង្គ្រាមវៀតណាម» សម្រាប់កងទ័ពអ៊ីស្រាអែល។

គួរបញ្ជាក់ថា ផែនការនេះត្រូវបានអនុម័តដោយគណៈរដ្ឋមន្ត្រីសន្តិសុខរបស់លោក នេតាន់យ៉ាហ៊ូ កាលពីថ្ងៃសុក្រ។ ការសម្រេចចិត្តនេះបានបង្កឱ្យមានការថ្កោលទោសយ៉ាងខ្លាំងក្លា ដោយមានប្រជាជនអ៊ីស្រាអែលរាប់ពាន់នាក់បានធ្វើបាតុកម្មនៅទីក្រុងតែលអាវីវ ដើម្បីទាមទារឱ្យមានការឈប់បាញ់ជាបន្ទាន់។ ក្រុមប្រឹក្សាសន្តិសុខអង្គការសហប្រជាជាតិ ក៏ត្រូវបានគេរំពឹងថានឹងបើកកិច្ចប្រជុំមួយ ដើម្បីពិភាក្សាអំពីផែនការនេះផងដែរ៕ (ប្រភព៖ Reuters)