កងនាវាចម្បាំងរុស្ស៉ីនិងចិន ត្រៀមបំពេញបេសកកម្មល្បាតនៅតំបន់អាស៊ី-ប៉ាស៊ីហ្វិក ក្រោយធ្វើសមយុទ្ធរួមគ្នា

មូស្គូ៖ នៅថ្ងៃពុធ ទី៦ ខែសីហា ប្រព័ន្ធផ្សព្វផ្សាយរុស្ស៉ី Interfax បានរាយការណ៍ថា កងនាវាយោធាជើងទឹករុស្ស៉ីនិងចិន នឹងបំពេញបេសកកម្មល្បាតរួមគ្នា នៅតំបន់អាស៊ី-ប៉ាស៊ីហ្វិក ក្រោយទើបតែធ្វើសមយុទ្ធរួមនៅសមុទ្រជប៉ុន។

ដោយផ្អែកលើសេចក្តីថ្លែងការណ៍ពីអង្គភាពព័ត៌មាន នៃកងកម្លាំងជើងទឹករុស្ស៉ីប្រចាំប៉ាស៊ីហ្វិក Interfax បាននិយាយថា កងទ័ពជើងទឹករុស្ស៉ីនិងចិន នឹងចល័តកងនាវាដើម្បីបំពេញបេសកកម្មល្បាតរួមគ្នា នៅតំបន់អាស៊ី-ប៉ាស៊ីហ្វិក។

កាលពីថ្ងៃទី១ ដល់ថ្ងៃទី៥ ខែសីហា កងទ័ពជើងទឹកទាំងពីរ ទើបតែបានធ្វើសមយុទ្ធយោធារួមគ្នា នៅតំបន់សមុទ្រជប៉ុន ហើយអំឡុងដំណាក់កាលចុងក្រោយនៃសមយុទ្ធ នាវាចម្បាំងរុស្ស៉ីនិងចិន ក៏បានធ្វើលំហាត់បាញ់គ្រាប់ពិតផងដែរ។ កងកម្លាំងជើងទឹករុស្ស៉ីប្រចាំនៅប៉ាស៊ីហ្វិក បាននិយាយថា សមយុទ្ធជាមួយចិននោះ គឺដើម្បីពង្រឹងការការពារខ្លួន ដោយមិនមានគោលដៅប្រឆាំងប្រទេសដទៃផ្សេងទេ៕(ប្រភព៖ Reuters)