វៀតណាម នឹងហាមឃាត់ម៉ូតូប្រើសាំង នៅរដ្ឋធានីហាណូយ ដោយសារបារម្ភពីការបំពុលខ្យល់

ហាណូយ៖ ជាផ្នែកមួយនៃកិច្ចប្រឹងប្រែងថ្នាក់ជាតិ ដើម្បីទប់​ស្កាត់​ការបំពុលខ្យល់អាកាស អាជ្ញា​ធរ​វៀតណាម នឹងហាមឃាត់ម៉ូតូប្រើសាំង នៅតំបន់កណ្ដាលរដ្ឋធានីហាណូយ ដោយ​ចាប់​ផ្ដើម​ពីខែកក្កដា ឆ្នាំ២០២៦។

ប្រព័ន្ធផ្សព្វផ្សាយរដ្ឋវៀតណាមបានរាយការណ៍ថា បទបញ្ជាដាក់ចេញដោយនាយករដ្ឋមន្ត្រីវៀតណាម លោក ផាម មិញជិញ នឹងត្រូវ​អនុ​វត្ត​ក្នុង​តំបន់​កណ្ដាល និងនៅតាមបណ្ដោយផ្លូវសំខាន់ៗព័ទ្ធជុំវិញរដ្ឋធានីហាណូយ។ អាជ្ញាធរមានភារកិច្ចបញ្ឈប់ការប្រើប្រាស់ម៉ូតូប្រើសាំងជាដំណាក់កាលឱ្យបានមុនកាលបរិច្ឆេទខាងលើ។

នៅវៀតណាម ម៉ូតូគឺជាមធ្យោបាយធ្វើដំណើរ និងដឹកជញ្ជូនដ៏ពេញនិយមសម្រាប់​ប្រជា​ជន​ភាគច្រើនក្នុងចំណោមប្រជាជនជាង ៨លាននាក់រស់នៅក្នុងទីក្រុងហាណូយ។ ហា​ណូយ មានម៉ូតូជិត ៧លានគ្រឿង និងរថយន្ដ១លានគ្រឿង។ ប៉ុន្តែដោយសារតែ​ប្រាក់​ចំណូលកើនឡើង ហើយមនុស្សកាន់តែច្រើននាំគ្នាប្រើប្រាស់យានជំនិះផ្ទាល់ខ្លួន។ ការ​បំពុលខ្យល់អាកាស បានក្លាយជាបញ្ហាមួយគួរឱ្យព្រួយបារម្ភរឹតតែខ្លាំងឡើង ដែលធ្វើឱ្យ​រដ្ឋធានីហាណូយ ជាប់ឈ្មោះក្នុងបញ្ជីទីក្រុង ដែលមានការបំពុល​ខ្យល់​អាកាស​ខ្លាំង​បំផុត។

វៀតណាម ក៏មានបំណងប្ដូរពីការប្រើប្រាស់យានជំនិះឥន្ធនៈហ្វូស៊ីល ទៅជាយានជំនិះប្រើអគ្គិសនីផងដែរ ដើម្បីកាត់បន្ថយការបំពុលខ្យល់អាកាស និងដោះ​ស្រាយបញ្ហាប្រែប្រួលអាកាសធាតុ៕ (ប្រភព៖ ABC News)