រដ្ឋបាលស្រុកទឹកឈូ រៀបចំឲ្យទេសចរជាតិ និងអន្តរជាតិជិះកង់ដោយ​ឥត​គិត​ថ្លៃ ដើម្បីទស្សនាតំបន់ទេសភាពធម្មជាតិក្នុងភូមិសាស្រ្តស្រុក

 អត្ថបទ៖ ទ្រី ហៀន

 ខេត្តកំពត៖ រដ្ឋបាលស្រុកទឹកឈូ បានរៀបចំឲ្យទេសចរជាតិ និងអន្តរជាតិ អាចជិះកង់ដោយ​ឥត​គិត​ថ្លៃ ក្រោមជំនួយពីអង្គការ អេដ អេ អាកស្យុង។ សេវាកម្មថ្មីនេះធ្វើឡើងដើម្បីឲ្យ​ទេស​ចរ បានទស្សនាទេសភាពនៃតំបន់ទេសភាពធម្មជាតិ ទេសចរណ៍ ក្នុងស្រុកទឹកឈូ។ លើស​ពី​នេះ ពួកគេក៏បានចូលរួមថែរក្សាបរិស្ថាន បៃតង ថែមទាំងទទួលបានសុខភាពល្អផងដែរ។

លោក អ៊ឹម ច័ន្ទសោធន អភិបាលស្រុកទឹកឈូ រៀបរាប់ថា កង់ចំនួន៧៥គ្រឿង បាន​រៀបចំ​ឲ្យ​ទេសចរដាក់ពាក្យស្នើជិះឥតគិតថ្លៃ ចាប់ពីម៉ោង ៨ព្រឹក រហូតដល់ម៉ោង៥ល្ងាច។ លើស​ពីការជិះកម្សាន្តគន់ទេសភាព តាមតំបន់ទេសចរណ៍ ទេសចរ ក៏មានសុខភាពល្អតាមរយៈ​លំ​ហាត់ប្រាណដោយការជិះកង់ ព្រមទាំងចូលរួមរក្សាបរិស្ថានទៀតផង។ 

តាមរយៈការជិះកង់ជិត៣០គីឡូនេះ ទេសចរ អាចទស្សនារមណីយដ្ឋានបុរេប្រវត្តិ​នាង​សេ​ដា​ឱន ឬភ្នំក្បាលរមាស ទស្សនារមណីយដ្ឋានភ្នំឈ្ងោក ទំនប់ប្រទាក់ក្រឡា ដែលជា​ទីតាំ​ង​គោល៕